مشيرة موسي تكتب :” يا حلاوة العيد …يا حلاوة “

العيد جانا … كل لحظة وانتم وكل الحبايب طيبيبن .. ربنا يتقبل منكم صالح الاعمال … لسه تكبيرات زمان في وداني … واضح ان انا مصرة اكون من بتوع زمان … الله علي زمان … وليالي زمان … والعيد زمان … الفرحة اللي بجد منورة كل الوشوش … العيد … الفرحة … التجمع … البساطة … الرحمة … عارفين واحشني ايه … فطار الصبح … لقاء القبيلة … لحظة اللقاء … الضحك اللي من القلب … العيدية … بصراحة واحشني كبار العيلة … مش احنا اهوه اول يوم … كام واحد قرر ياخذ عياله ويسافر الساحل … علشان الأجازة الطويلة … مش باتكلم علي اللي لسه بيسافروا البلد … دول حاجة تانية خالص … ولو ان اللي بيسافروا البلد دول قلوا جدا كمان لسببين … الأول ان الحبايب اللي بيروحولهم سبقونا لمكان آخر … الثاني انهم اتفرنجوا … يمكن بسبب الجواز … وباااوا من رواد الساحل … ما علينا … المهم ان الكل يفرح ويعيد بالطريقة اللي تعجبه … ربنا يسعد ويهنئ الجميع … بس يا ريت متنسوش تجبروا بخاطر ” الأقربون ” … دول ممكن يكونوا حد من الأهل اللي عيالهم سافروا وسابوهم … وممكن يكونوا من الجيران اللي مالهمش حد … وممكن يكون حد بيساعدكم في البيت أو بيحرس البيت … الست عائشة الجوهري صديقتي الانسانة الجميلة … بعتت رسالة منقولة ومكتوبة بالانجليزية … بتحكي انه في احد المقاهي الصغيرة لاحظ أحدهم ان اثنين من المترددين علي المقهي طلبا ٥ قهوة شربا قهوتهما وتركا ٣ قهاوي “coffee hanging “…وثلاث سيدات طلبن ٧ قهوةمنها ٤ ” coffee hanging” … وبدافع الفضول سأل الرجل احد العاملين بالمقهى عن معني الكلمة … امهله قائلا ستفهم حالا … تم ذلك حينما دخل رجل رث الملابس يسأل بمنتهي الثقة هل هناك ” coffee hanging “… يا الله علي الجمال والإنسانية …القادر يدفع لغير القادر دون سابق معرفة … قمة الرأفة والرحمة واحترام الإنسان … يحدث هذا ايضا في محال بيع السندوتشات والوجبات … هل يمكن أن ننقل هذه التجربة الي بلادنا … احيانا وانا في السيارة تقع عيناي علي طفل ينظر الي احد محلات بيع السندوتشات وقد سال لعابه … هل يمكن أن تكون الرحمة منهج حياة … يا ريت … كلام كبيييير جدا في أول يوم في عيد الأضحى … اغاني زمان برضه لها طعم تاني … في اغاني كتيييييير من بتاعة اليومين دول ” ناقصة سوى “…يعني نية كده من الآخر … مش عارفة لسه العيال بتروح ” السيما ” اول يوم العيد ولا خلاص … مش عارفة متوسط العيدية بأااااه كام اليومين دول … مش عارفة لسه في لبس عيد ولا خلاص … زمان كان كل يوم عيد له لبس جديد … مش انا اعترفت خلاص … اني من بتوع زمان وجدااااا كمان … المهم … من كل قلبي … تمنياتي القلبية … بقضاء اجازة سعيدة جدااااااااا مع كل الحبايب …استمتعوا واضحكوا والعبوا … حتي لو كنتم من أيام زمان …