مشيرة موسي تكتب عن ” الجواز وسنينه “

السؤال اللي محيرني من فترة وكل ما ارميه بعيد يرجع لي تاني هو ببساطة … ليه جوازات الايام دي ما بتطولش … ليه الجوازات نفسها قصير … حد يعرف … انا نفسي فكرتي عن الجواز زمان … وانا صغيرة كانت مختلفة تماما … بالنسبة لي الزواج كان عقد ابدي … علاقة توأمة تنتهي بموت أحد الطرفين … كانت الدبلة الذهب في ايد الراجل أو الست بتتحشر في الصباع اللي بيتخن زيه زي بقية الجسم علي مر السنين … حتي انهم في احيان كثيرة كانوا بيلجأوا الي قص الدبلة المحشورة عند موت أحد أطراف عقد الزواج …

ايه بأااااه اللي جري … انا كده وفي سني ده … وانا قاعدة في لوج المتفرج … وبمتابعتي للناس اللي حواليه … رصدت حاجة غريبة … شوفوا كده …
☆ البنات والولاد الشطار اللي متعلمين كويس … الجواز بالنسبة لهم اصبح مش من الأولويات … بناء ” الكاريير ” يسبق اي هدف اخر … الجواز عندهم بيتأخر شويتين تلاتة … وقد يصاحب قرار الزواج قرار اخر … هو شرط “عدم الخلفة ” …بمنطق هو في ايه في الدنيا يستاهل نجيب عيال علشانه … هي المشرحة ناقصة قتلة …
☆ اما البنات الحلوة جدااااااااا واللي علي درجة كبيرة من الهيافة … فهدفها بيكون اصطياد ” العريس
اللقطة ” … مش مهم حاجات كتير … المهم توفير مستوي صرف عالي … وفي حالة استحالة العشرة … الحلوة اسمها اتجوزت وعندها حساب في البنك …بمنطق ” اللي ييجي منه احسن من عينه ” ..
☆ اما البنات اللي لازم تتجوز … علشان دي سنة الحياة … وعلشان هي مش اقل من بنت عمتها … وعلشان أمها عايزة تفرح بيها وتشيل عيالها قبل ما تموت … فدي حظها اما يوقعها في حد محترم أو حد يطلع عين أهلها كلهم … بمنطق ” نصيبك لازم
يصيبك “…
طيب هو الغلط فين باااااه … في بنات لسه فاهمة الجواز غلط … ان الجواز هيحررهم من بيوت اهاليهم … إن الجواز ده هو الجري ورا بعض في الجنينة أو علي شاطى البحر … لا يا حلوين … ده كلام السيما … ولو حصل مرة كده ولا كده … ده كلام قبل الجواز … الجواز مسئولية كبيرة جدااااااااا …
اعرف عروس اكتشفت ان … زوجها اللي كان الطف انسان في الدنيا … هو شخص مختلف تماما داخل البيت … وعروس اخري اكتشفت بخل عريسها الشديد …عندما ارسل زوج اخته لشراء سندوتشات من البقال حتي لا يطلب العشاء في الفندق … وازواج وزوجات لا يعرفون شيئا عن النظافة الشخصية … وأسباب كثيرة اخري … قد تؤدي الي الطلاق …

نصيحتي للأهل … اشبعوا أولادكم بحبكم منذ الصغر … ناقشوهم … استمعوا لهم … احترموا اختيارتهم … الخطوبة فترة اختبارات … راقبوا وانصحوا ولا تتعجلوا كتب الكتاب … قد يكون هذا الحب وهم كبير … وقد يكون هو الأمان المنشود …