مشيرة موسي تكتب ” الله يا ست “

اتفقنا خلاص ان الاصحاب الحلوين رزق … طب ليه بنكرر الكلام … علشان اللي ماعرفش يعرف … مساء امس … سعدت انا وصديقاتى بحضور احتفالية “عيد الحب ” المؤجلة من يوم ١٨ فبراير … والتي اقيمت علي المسرح الكبير بدار الاوبرا … الحفل ” في ذكري ام كلثوم في عيد الحب … فرقة عبد الحليم نويرة للموسيقى العربية قيادة المايسترو احمد عامر … استمعنا وطربنا مع هذه الاغاني بالترتيب … امل حياتي … والاطلال … وحيرت قلبي معاك … وجاء الختام مع فكروني … الكلام اللي جاي … أو الحكاية دي … من وحي ما سمعنا … يعني من وحي الخيال … واي تشابه مع أي قصة حب حصلت أو لسه هتحصل … هو مجرد صدفة … وانا غير مسؤولة … بس يعنى الحقيقة تقريبا دايما القصة “هى هى ” مع اختلافات بسيطة جدااااااااا … دي حكاية العاشقة الولهانة … اختارته من بين عشرات الأصدقاء والزملاء … هامت به وهام بها … تزوجته رغم كل الاعتراضات … اعتبرت نفسها “المحظوظة” … فهواختارها هي … وهو احبها هي … وهى صدقت الست ثومة … صدقت كلمات اغنيتها …وغنت امل حياتى يا حب غالى ما ينتهيش …يا احلى غنوة سمعها قلبي ولا تتنسيش … خذ عمري كله بس النهاردة خليني اعيش خلينى جنبك …في حضن قلبك وسيبني احلم يا ريت زمانى ما يصحنيش … بس اللى حصل فعلا ان زمانها ماسمعش كلامها … عمل ايه ؟ صحاها … مش بشويش لا خالص … بكت كثيرااااا … وجدت نفسها تتسأل … يا فؤادي رحم الله الهوي … كان صرحا من خيال فهوي … اسقني واشرب علي اطلاله وارو عني طالما الدمع روى … كيف ذاك الحب امسى خبرا وحديثا من أحاديث الجوي … هى صادقت الليل … تسأل … و تناجيه … حيرت قلبي معاك … وانا بداري واخبى …قل لي اعمل ايه وياك … ولا اعمل ايه ويا قلبى …بدي اشكى لك من نار حبى …بدي احكي لك ع اللي فى قلبى … واقولك ع اللي سهرنى …واقولك ع اللي بكانى …واصور لك ضنا روحى … وعزة نفسى منعاني … الحبيبة بعد ما لملمت نفسها … حاولت ترجع لحياتها … اللي أصبحت منقوصة ومش طبيعية … قابلت الأصدقاء المشتركين اللي فكروها … فرددت باكية … صحوا نار الشوق في قلبي وفى عيوني … بعد ما صدقت انى قدرت انسى بعد ما قلبى قدر يسلاك وينسى …جرحوا الجرح اللي قرب يبقى ذكرى … اللى عشته معاك رجعت اعيش عليه… اللى فات وياك يا روحى بعود اليه … وفى لحظة صدق اعترفت… فكروني ازاى … هو انا نسيتك ؟؟؟ اوعوا تفتكروني عايزة انكد عليكم ولا حاجة … ابدا والله … هو ترتيب الاغاني هو اللى خلاني افكر بالطريقة دي … عايزاكم تحبوا وكل حاجة … بس ماتندفعوش قوى علشان ما تتوجعوش قوى …