محمد محمود عيسى يكتب: مش عارف أكتب عن ايه ولا ايه
أزمات ومشاكل كتيرة بتحيط بينا من كل جانب وتحاصرنا في حياتنا اليومية من أول مستلزمات المعيشة والحياة وصولا إلى المشاكل والأزمات الإقليمية والحدودية المجاورة مشاكل وأزمات كتير أصبحت مستلزمات أساسية من يومك وحياتك ومعيشتك مع بيتك وولادك ومع أصحابك وجيرانك مع الناس اللي متعرفهمش في الشارع وفي وسائل المواصلات.
عادي جدا يكون يومك وحديثك مع الناس عن السكر وأسعاره وعدم وجوده وحكايات الطوابير والزحام الشديد وقصص وبطولات الحصول على كيس سكر وعن دواء ناقص ومش موجود في الصيدليات ولا عن الأزمة الاقتصادية اللي بتزيد يوم بعد يوم قصص وحكايات كتير
نتكلم عن الحوار الوطني لدراسة ومناقشة الأزمة الاقتصادية وخلينا نتكلم بكل بساطة وهدوء ونسأل سؤال يا فندم لو عندك مريض بيموت تعمل جلسة وحوار ومناقشات علشان تعالجة ولا تدور على أشطر دكتور وبأقصى سرعة توديه للدكتور الشاطر علشان ينقذ المريض ويعالجه قبل ما يموت هو كده يا فندم لما تكون عندنا أزمة اقتصادية معقدة وقاسية وصعبة لسه يا فندم هنعمل جلسات حوار وطني ومناقشات واستراحات واتفاقات واختلافات وتوصيات ولا الأفضل اننا وبشكل عاجل ندورعلى أفضل الكفاءات الاقتصادية المصرية والعالمية ونديهم ملف الاقتصاد المصري ونقول لهم شوفوا لنا حلول عاجلة وعلمية وصحيحة ابعت يا فندم هات الدكتور محمد العريان والدكتور فاروق العقدة والدكتور يوسف بطرس غالي والسيد طارق عامر وغيرهم بنفس الكفاءة واديهم ملف الاقتصاد وقعدهم في شرم الشيخ أسبوع زمن وكلفهم بخطة إصلاح مصرية وعاجلة وسريعة وخليهم يختاروا فريق اقتصادي جديد وقوي وطموح وشاب يصلح الدنيا اللي وقعت لكن لسه حوار وطني وكلمات وتصوير وربنا يرحمنا .
عادي جدا تسمع قصص وشطحات أسعار الحديد وكأنك عايش في كوكب تاني منعزل عن أسعار العالم في متوسطات أسعار الحديد خاصة وانت بتشوف اللي بيحصل عندنا من فوضى أسعار الحديد وكل واحد يحكي قصة مختلفة عن السبب في فوضى أسعار الحديد وخاصة لما يقولك دي قصة سرية محدش كتير يعرفها وتحزن لما تشوف دولة الكويت ازاي اتعاملت مع أزمة الحديد عندهم لما حاول تجار الحديد يزودوا الأسعار زيادة بسيطة الحكومة هناك تصدت لهم وقررت انها تسمح لكل الشركات والأفراد انهم يستوردوا الحديد من أي دولة بأي أسعار واجبرت تجار الحديد في الكويت على خفض الأسعار غصب عنهم .
نتكلم عن أزمة انقطاع الكهرباء في شهر رمضان المبارك وجدول الانقطاع للكهرباء واللي بعدها مجلس الوزراء الموقر تكرم وتعطف على الناس والمواطنين وقال لهم انه مش هيقطع الكهرباء عن الناس في شهر رمضان وتحزن على حال مصر اللي نورت المسجد النبوي الشريف وكانت منورة في وقت كان كل اللي حواليك عايشين في ظلام أو عايشين على نور المشاعل البدائية
تحزن لما يكون عندك أزمة كهرباء ومتفكرش انك تحلها بحلول غير تقليدية ومتفكرش انك تلجأ للطاقة الشمسية تنور بيها المدن والأحياء والشوارع تحزن لما ميكنش عندك جرأة في قرار البحث عن حلول لمشكلة الكهرباء وتطلع تكليف حكومي عاجل لوزير التعليم العالي ووزير الإنتاج الحربي وتكليف كليات الهندسة بتصميم محطات طاقة شمسية منخفضة التكلفة وعالية الإنتاج والكفاءة خلال ثلاث شهور وتكلف المصانع الحربية بوقف كل خطوط الإنتاج الأخرى والتفرغ تماما لإنتاج محطات الطاقة الشمسية وتوزع محطات الطاقة الشمسية على المواطنين بالمجان والتركيب مجاني وفائض استهلاك كهرباء الطاقة الشمسية يرجع للشبكة القومية للكهرباء تخيل يا فندم انك حولت كل بيوت مصر لمحطات انتاج طاقة شمسية تنور وتبيع كهرباء وببلاش وصنعت اقتصاد جديد في البلد شركات صيانة وفنيين وعمال وطلبة في الجامعات بتشتغل . امنع يافندم إجازة الصيف السنة دي وكلف كل طلبة الجامعات انهم يشتغلوا في المصانع الحربية ومعامل الجامعات لإنتاج محطات الطاقة الشمسية كلف يا فندم وزير الإسكان بمنع إصدار تراخيص مباني لأي كمبوند أو شركة عقارية أو مشروع سكني بمنع الاعتماد على الكهرباء الحكومية وضرورة إنشاء محطات طاقة شمسية يا فندم السعودية والامارات والكويت وقطر ودي دول نفطية عملاقة عندها مشروعات ضخمة للاعتماد على الطاقة الشمسية احنا مش اغنى منهم يا فندم طلع قرارا بمنع استيراد أو تصنيع مكيفات الهواء الكهربائية وكلف طلبة كليات الهندسة وشباب مصر بتصنيع مكيف هواء للمنازل والشركات يعتمد على الطاقة الشمسية وشوف النتائج المبهرة اللي هتبهرك وتقدر تصدر المكيفات دي للخارج وتوطن صناعة جديدة وقوية في مصر
نتكلم عن أزمة غزة والضغوط اللي بتتعرض لها مصر والمواقف اللي مش في صالحنا واللي لو كان اقتصادنا قوي ومرن ومتنوع كنا قدرنا نصمد ونواجه ونستمر في المواجهة والتصعيد ولو كنا رتبنا الدنيا عندنا في السوق ومع التجار وفرضنا هيبة وقرار الدولة مكناش وقعنا في أسر التجار والمحتكرين وصناع الأزمات في كل حتة وفي كل حاجة من أول السكر لغاية مواد البناء ويطلع التاجر فيهم في التلفزيون يتكلم بكل جرأة واستعلاء وكأنه مفيش دولة تحكمه وتمنعه نشوف يا فندم أزاي بوتين في روسيا اتعامل مع التجار المحتكرين واللي حاولوا يبتزوا ويضغطوا على الدولة في روسيا ويصنعوا أزمات داخلية .
نتكلم عن مدرس الفيزياء الخصوصي اللي قتل إيهاب الطالب اللي بياخد عنده درس خصوصي بطريقة بشعة ومحزنة علشان ياخد من أهله فلوس والموضوع عدى عادي جدا عند وزارة التربية والتعليم بدون قرارات وبدون إجراءات وبدون وقفة حاسمة وترتيب الأمور وكأن الجريمة دي حصلت في موزمبيق مش عندنا يمكن السيد وزير التعليم منتظر جريمة أكبر لا قدر الله علشان يتحرك وياخد قرارات تحمي الطلاب في الدروس الخصوصية وتمنع تكرار الجرائم مستقبلا
نتكلم عن شكل الناس ورمضان داخل والناس شكلها حزين ومكتئب من الغلاء والأسعار ومتطلبات المنازل والحياة وشراء لوازم البيوت وكل واحد يحكي لك حكاية شكل من المعاناة
نتكلم عن أيه ولا ايه ولا ايه حكايات وقصص كتير وفي الأخر ربنا موجود
