مشيرة موسي تكتب ” قلب امه “

كتبت عن ” حبيبة ابوها ” … مخلصتش … قالوا متحيزة للبنات … وكلام كتيييييير … المرة دي هاكتب عن ” قلب امه ” او “فلذة كبدها “… النصيحة الفصيحة اللي باقولها … ان الواحد يشبع بنته حب وحنان علشان مش اول ماتسمع كلمة حلوة تسيب الدنيا وتجري وراها … النصيحة دي تجوز كمان علي ” الصبي ” … ده كلام اساسي … بيقولوا أن الواد هو ” نني عين امه ” … في حالات كتيييييير … لكن الأصول اصول يا ام البرنس … احنا عايزين نربي رجالة بحق وحقيق … مش بس نكتفي بكلمة” ذكر” في البطاقة الشخصية … واكيد شوفنا من الأشكال دي كتيييير في الفترة اللي فاتت … امهات بوظت عيالها دلع … غالبا لأنهم طبقوا مبدأ ” وانا اتعب نفسي في التربية ليه … وبكرة تيجي واحدة تاخذه علي الجاهز ” … حتي المثل بيقول ” ربي يا خايبة للغايبة ” … احنا كنا ٣ بنات وصبي … لكن الحقيقة عمري ما سمعت كلام زي ” قومي هاتي كوباية ميه لاخوكي ” أو ” حضري الأكل لاخوكي ” … وطبعا كنت باستعجب لما اسمع الكلام ده عند حد او حتي اشوفه في الأفلام … معاملة البنت كانت زي الولد … الالتزامات واحدة … عادة ترتيب السرير مثلا كانت شئ اساسي منذ الصغر… يوم الاجازة كانت جملة أبي الشهيرة ” ساعدوا امكم ” … النظام نظام علي البنت والولد … رزقت بولدين الحمد لله … وكان كل همي منذ صغرهم… إن اعلمهم ” الأصول ” … حاولت اعلمهم الاعتماد علي نفسهم … كنت اتصور انه في اي وقت … ممكن لظروف الدراسة او العمل يضطروا للاعتماد الكامل علي انفسهم … وعموما في الظروف الحياتية كنت بانصحهم كتيييييير … فأقول مثلا ” في موقف زي كذا كذا … لازم تعمل كذا كذا” … علشان مراتك تقول انك متربي صح ” … هو الحقيقة دلوقتي … في الزمن ده … الواحد ساعات يقول مش كل الناس تستاهل تتعامل بالاصول … لكن ارجع تاني اقول الأصول اصول … من شب علي شئ شاب عليه … خلاصة الكلام … العيال لازم تتربي … سمعت قصة غريبة … في احدي الدول الشمالية … لا اريد ان اسميها … الاهالي لا يربون أولادهم… عكس المهاجرين من الدول العربية وجنوب اسيا … وهو ما يسبب المشاكل اليومية … في دعوة حلوة سمعتها واسعدتني جدااااااااا جدااااااااا ” الله يرحم اللي رباكم” … الله يرحم ابويا وأمي … والله عملوا اللي عليهم وزيادة كمان …