محمد محمود عيسى يكتب: عمارة في الميناء وعمارات في المواني
الرئيس عبد الفتاح السيسي كان بيتكلم في افتتاح ميناء تحيا مصر متعدد الأغراض في الإسكندرية عن الفساد وذكر واقعة شهيرة ومثيرة اللي هي عن الراجل اللي بنى عمارة في ميناء الإسكندرية والموضوع وصل للرئيس والرئيس أمر بالقبض على الراجل صاحب الأرض وميخرجش غير لما يسيب الأرض وده معناه ان الرئيس واخد باله ان الفساد اللي اتعمل لا يمكن يسيبه واللي أخد الأرض داخل المينا لا يمكن يسيبه حتى لو عمل ورق في غفلة من الزمان وأكمل الرئيس حديثه قائلا: لو معملتش كده يقدر المحافظ يعمل كده لا خايف …. يقدر وزير النقل يعمل كده ( مش أنت ) لأخايف لا إيه خايف اللي عايز يبني بلده مبيخفش أبدا إلا من ربنا هو اللي بيحاسبه “
الواقعة جميلة جدا وبتدل على مدى حرص الرئيس وخوفه على مصالح وممتلكات الشعب والبلد ومتابعته الدقيقة لكل التفاصيل وتدخله الحاسم والصارم في مواجهة الفساد وخاصة اللي بيتعلق بالتعدي على أموال وممتلكات الدولة.
لكن يا فندم زي ما االراجل اللي بنى عمارة في ميناء الإسكندرية بنفوذه وبجاهه بأمواله وبقوته بشلته بكل الحاجات دي ومحدش قدر يواجه لأنهم خايفين منه المحافظ خايف ووزير النقل ” مش أنت ” خايف فيه ناس كتير يا فندم بانيين عمارات كتير وفي موانئ كتير في مصر وناس كتير خايفه منهم
ياريس محافظين خايفين منهم ووزراء خايفين منهم ومسؤولين كتير خايفين منهم وزي ما سيادتك تدخلت وواجهت صاحب عمارة ميناء الإسكندرية وأمرت بالقبض عليه فورا حتى يسيب الأرض كمان ياريس بقية العمارات اللي في بقية مواني مصر محتاجة سيادتك علشان تتدخل وترجع الأراضي للبلد ويرجع الأمل للناس وترجع الثقة في البلد للناس ويرجع إيمان الناس ببلدها يرجع إيمان الناس بالقانون والعدل والمساواة وتكافؤ الفرص والشفافية وترجع ابتسامة وضحكة الناس مرة تانية وكل الحاجات دي بقيمة أرض ميناء الإسكندرية وأهم منها كمان
رئيس النادي المشهور اللي مش بيقف على حاجة ولا بيقف على حد وتجاوزاته طالت الجميع ومحدش قادر يقرب منه لأنهم خايفين باني عمارة في المينا ياريس
الشلة اللي مسيطرة على الرياضة في مصر وبتتحكم فيها تماما وبينهم مصالح ومنافع وبزنس وحاجات كتير ومحدش قادر يقرب للشلة دي علشان خايفين دول كمان بانيين عمارة في المينا ياريس
الشلة اللي مسيطرة على الإعلام ومحدش يقدر يخترفهم ولا يحاول يقرب منهم ولا يقدم صورة إعلامية مصرية جديدة ومختلفة تليق بمصر وبالجمهورية الجديدة غير دول كمان محدش قادر يقرب منهم علشان خايفين دول كمان بانيين عمارة في المينا ياريس
ياريت يا ريس البلد مليانة شلل مسيطرة ومتحكمة في أماكنها ونفوذها وناس كتير بانيين عمارات في مواني كتير ومحدش قادر يقرب منهم علشان خايفين ياريس
كل مكان في مصر ليه الشلة بتاعته وليه أصحاب العمارة بتاعته في الثقافة شلة الثقافة وعمارة المصالح والمنافع والسفريات والمؤتمرات والندوات واللي كمان بانيين عماراتهم في المينا
في الإعلام شلة الإعلام وعمارة الإعلام اللي في المينا في الفن شلة الفن وعمارة الفن اللي في المينا في الرياضة شلة الرياضة وعمارة الرياضة اللي في المينا في التجارة شلة التجار الكبار اللي متحكمين ومسبطرين على الأسواق وبانيين عماراتهم في المينا
في الاستيراد والوكلاء شلة الوكلاء والتجار والموزعين اللي بيستوردوا سلع رديئة جدا وبأقل المواصفات واللي يتأثر على حياة المصريين وشبكات الطرق وبأقل مواصفات أمان وجودة وبتدخل مصر وبتتباع بأغلى الأسعار واللي عاملين أسعار حسب الشلة دول كمان بانيين عمارة في المينا
ومواد البناء اللي سعرها أغلى من الاسعار العالمية ومتشرع لها قوانين تحمي تجارتها وأصحابها وشلل وبزنس ومصالح ومكاسب كتيرة ناس كتيرة خايفة تقرب منها.
عمارات كتير يا ريس مبنية في مواني كتير في مصر والمحافظ خايف يقرب منها ووزير النقل ” مش أنت ” خايف يقرب منها ومحتاجة سيادتك تواجهها وتصحح مسارها وتعيدها للشعب ولمصر ، عمارات كتير ياريس في مواني كتير مأثرة على اقتصاد البلد وحياة المصريين لو واجهتها ورجعتها للمصريين حياة الناس هتتغير وثقتهم في بلدهم هترجع وتقوى وأموال كتير هترجع للبلد من ثمن العمارات اللي في المواني العمارات دي يا فندم فيه منها من زمان ومن سنوات طويلة وأصحابها أقوياء وليهم نفوذ وقوة بتوفر لهم حماية كبيرة وبتخلي الكل خايف يقرب منهم ومفيش غير سيادتك اللي تقدر تقرب من الناس دي ومن العمارات دي وترجعها للبلد
ادخل ياريس واقتحم خط الشلة في مصر اللى هو أصعب وأخطر من اقتحام خط بارليف واهدم كل العمارات اللي في كل الموانئ وهتكون حققت أعظم انجاز في تاريخ مصر الحديث
