مشيرة موسى تكتب … ” الدنيا دوارة “

كنت قاعدة مع بعض الصديقات من جروب ” الستات الالماظ ” … الحكايات كتيييييير والتجارب اكتر بكتييييير … وصلنا لنقطة لا خلاف عليها … ايه هى بأااااه … إن اللي بيعمله ” المفترى ” فى الناس بيلف يلف ويرجع يصيبه هو شخصيا او يصيب أغلى حبايبه … صديقتي الالماظاية النادرة ” هايدى ” راحت قايلة حتة مثل شعبى … الحقيقة انا انبهرت … وقررت ابهركم انتم كمان … ايه هو المثل بأااااه … “اللى تعمله الكفوف … يتشال على الرفوف … للولد الملفوف ” … يا نهار ابيض على الكلام الحكيم … واسمحولى اترجمه للناس اللى مالهاش فى الأمثال … المثل بيقول أعمالكم هتتشال على الرفوف لولادكم اللى لسه مولودين … يعنى النصيحة الفصيحة ” خافوا ربنا ” … معظم الحكايات كانت عن ” الحموات الفاتنات المفتريات ” وطبعا هنا لا اقصد كل الحموات … وطبعا فى رجالة اكثر افتراء … * اعرف سيدة حولت حياة مرات ابنها إلى سواد … بعد فترة اضطرت بنت الناس لطلب الطلاق حفاظا على مخها وصحتها النفسية … انسحبت حتى لا تفرق بين الإبن وأمه … سبحان الله شربت اخت زوجها من نفس الكأس وعادت إلى بيت امها بطفلين لا تملك حق اطعامهم … * سيدة أخرى كانت تغار من “سلفتها “الجديدة … نفذت كل الخطط الشيطانية لتتخلص من منافستها فى حب العائلة لها كما كانت تدعى … بالصدفة وبعد سنوات طويلة كل أعمالها وأكثر اتشالت لابنتها الوحيدة. * اعرف عائلة كاملة ” ستات ورجالة ” ساوموا اب فى طلاق ابنته … فاصاب أبنائهم ما جنته اياديهم … الضحايا كتيييييير والحكايات كتيييييير … بنسمع منها كل يوم الغرائب … من كتر ما باسمع … أعتقد الفلوس جننت الناس … وخلعت عنهم الحياء والأصول وأشياء أخرى كنا نتغنى بوجودها فى الشخصية المصرية غير الملوثة … ربنا يهدى الناس كلها … انا بس عايزة احذرهم … إن المفترى آخرته وحشة ووحشة جدااااااااا كمان …