مشيرة موسى تكتب ” عشق المسرح “

انا بأحب المسرح من زمان … وانا صغيرة كان يوم الخميس ده هو يوم الفسحة … اسبوع نروح السينما واسبوع نروح المسرح … الأفلام كانت حلوة والمسرح كان رائع … مش عارفة ايه اللى حصل … لا بأااااه فى سينما ولا فى مسرح … ناس تقول أزمة ورق ( يعنى مفيش كاتب كويس ) وناس تقول أزمة جمهور ( يعنى الناس عايزة الهيافة ) … وناس تقول أزمة إنتاج ( يعنى الموضوع الجد ميأكلش كافيار ) … الناس كده بقى مفروض عليهم نوع جديد من مسرح الهلس اغنيتين على رقصتين على شوية ايفيهات جنسية … والشباب كده افتكر ان ده هو المسرح … بس الله يبارك لهم بتوع ” ماسبيرو زمان ” فضحوهم بعرض مسرحيات زمان … ليه بأااااه انا بجيب سيرة المسرح … علشان مؤخرا … كل فترة كده الاقى اصحابى بينبهونى ان فى مسرحية كويسة وبيقولوا ” اوعى تفوتك ” … وانا أثق فى ذوق اصحابى المسرحى … ما احنا جيل واحد بأااااه … عارفين المثل اللى بيقول ” الفقى لما يسعد ” … انا كنت بالظبط كده الاسبوع ده … يوم السبت كنا حاجزين انا واصحابي تذاكر لحفلة الفنان الرائع ” عمرو سليم ” على المسرح الصغير بدار الاوبرا … فنان بجد … فى كل مرة بيبهر جمهوره ببرنامج غنائى مختلف … اما تفاعله مع الجمهور فده شئ ممكن يدرس … كاريزما ملهاش مثيل بصراحة … جمهور حفلات عمرو سليم كمان بجد جمهور مميز شكلا وموضوعا … زى جمهور حفلات زمان …الحقيقة خرجنا كلنا من الحفلة شبعانين مزيكا… اما يوم الأحد … فكنت محظوظة انى شوفت مسرحية انصحكم تشوفوها … مش قلت لكم ” الفقى لما يسعد ” … هى مونودراما مدتها ساعة بس … يعنى مسرحية قائمة على ممثل واحد بس … الحقيقة انبهرت جدااااااااا … مفيش لحظة ملل واحدة … المسرحية اسمها ” ومرت الأيام ” على مسرح الهناجر بالاوبرا … تأليف ” امل فوزى … تعجبت فعلا ان ده اول عمل لها … دى ست بأااااه تجرأت ومدت ايدها جوه قلب ومخ ونخاشيش معظم الستات ” المفعول بهن ” … انا مش عايزة احرق لكم المسرحية … بس حقيقى انصحكم تشوفوها بسرعة … المسرحية ممتدة اسبوع كمان … اما الممثلة الجبارة ” وفاء الحكيم ” … فأنا بارفع لها القبعة … وتصفيق حاد كمان … بسهولة شديدة ( وده امر صعب جدااااااااا على خشبة المسرح ) كانت بتنقلنا من اى احساس لعكسه … وبرضه مش عايزة احرق المسرحية … لكن انا الحقيقة بيوجعنى الظلم … ودايما باستعجب من الناس اللى بيدوا نفسهم الحق فى تبرير زواج الرجل ” شرعى أو عرفى” من زوجة أخرى … والاتهام الكليشيه الجاهز ” ما هى اكيد مقصرة معاه ” … ودايما ردى ” وليه هو ما يكونش اللى مقصر معاها … وتعمل ايه الست اللى باعت الدنيا وما فيها علشان ترضى الراجل ده … وفى الاخر تكتشف زواجه سرا … أدعوكم لمشاهدة المسرحية وخصوصا ان احنا داخلين على اعياد واجازات … كل لحظة وانتم بخير وسعداء ومتجمعين مع حبايبكم …