مقالات الرأى
مشيرة موسى تكتب ” الافوكاتك “
انا اعترفت اعتراف واضح وصريح … انا مش متابعة للتلفزيون … واكيد مش متابعة لمسلسلات رمضان … وده قرار أخذته من كام سنة … لما كانوا بيطلعوا كل المصريين عايشين فى قصور وبيعملوا كل المصايب وكأنها شئ عادى جدااااااااا … المهم بعد مرور السنين انا لسه عند كلمتى نظريا … ايه اللى اختلف بأااااه … اقولكم … انا ابويا كان راجل محامى ناجح ومحترم جدااااااااا … اتعلمنا منه احترام القانون … اتعلمنا ان مخالفة القانون جريمة … وجريمة كبيرة كمان لما يكون المخالف رجل قانون … طيب ايه بأااااه الموضوع برضه … الحقيقة انا ضعيفة امام كلمة ” الافوكاتو ” … ابويا زى ما قلتلكم كان محامى الله يرحمه واختى كمان محامية ربنا يديها الصحة … فى اى موقف يحتاج استشارة قانونية لازم نسألها الرأى القانونى … الكلام ده بس مقدمة … انا بأااااه كل ما افتح الفيس بوك يطلع لى مقطع من ” الافوكاتو ” … يعنى مش انا اللى باروح له … المقطع هو اللى بييجي لوحده … اقوم انا اتفرج عليه … وطبعا اترحم على ابويا … اقول ايه ولا ايه … شوفت كل ال ” لا معقول ” فى عدة مشاهد متفرقة … ان يتم توكيل محامية صغيرة فى قضية كبيرة … مش مشكلة … واحدة تتضرب على رأسها ٣ مرات وتتدفن وترجع رابطة رأسها بشاش عرضه ٥ سم … ولا فى ارتجاج بعد الشر ولا اى حاجة … وفى المستشفى ما يكتشفوش انها حامل … سبحان الله … وهى نفسها ما تحسش بالحمل الا لما يغمى عليها فى الحلقة قبل الأخيرة … سيبكم من كل ده … ايه هدف ” المتر نعمة ” فى التمثيلية … استغلال شطارتها فى ايه ؟ … احنا اتعلمنا ان لو حد عرف بجريمة (وهنا بنتكلم عن جريمة قتل ) ولم يبلغ عنها … فكانه شريك … فين دور الدولة من الأساس … يعنى مسموح ” للمتر نعمة ” الاستعانة بالمجرمين والسرقة والخطف ودخول بيوت الناس من غير استئذان … ده غير إظهار ان الملايين دى ” وكأنها ملاليم ” … كده انا مفروض اقتنع ان حقى لازم اجيبه بايديا … واحدة بتنتقم ان جوزها اتجوز تانى … واحدة بكل مهارات الست نعمة الافوكاتو مش مصدقة رجل البوليس اللى ضبط زوجها فى جريمة مخلة … واحدة فى مهارة الست نعمة الافوكاتو وزعت عربيات وفلوس على كل الناس ولسة سايقة عربية مهكعة … واحدة زى الست نعمة الافوكاتو واخدة انفراد للكلام بدون مقاطعة اى حد حتى لو كان ابوها أو استاذها أو حتى جوزها او مراته الجديدة اللى هى ممكن تقتحم بيتها فى اى لحظة بدون احم ولا دستور … واحدة زى الست نعمة الافوكاتو بتسوق العربية حافية وده أمر سخيف بيتكرر فى الحلقة الواحدة اكثر من مرة … باختلاف بسيط علشان لا نصاب بالملل مرة بترمى الجزمة جنبها ومرة على الكنبة الخلفية … نعمة بالمناسبة ابوها واستاذها بيقولوا لها اكثر من مرة ” يا جزمة ” … ما علينا انا زعلت على مهنة الافوكاتو جدااااااااا … بس مادام ابوها فى التمثيلية موافق … وكمان الاستاذ المخرج موافق احنا مالنا بأااااه …بس احنا هنا ممكن نطالب وننادى بإعادة تسمية المسلسل نعمة الافوكاتك ( تعود على المخرج )أو نعمة الافوكاتنا (تعود على المسلسل) … وكده يبقى ممكن ” الافوكاتو ” الحقيقى ما يزعلش ولا يأخذ على خاطره … الله يرحم ابويا اللي علمنا الصح ..