MAWAKALA WA UKUSANYAJI MAPATO KUANZA KUTUMIA MFUMO WA TAUSI

Ofisi ya Rais Tawala za Mikoa na Serikali za Mitaa (TAMISEMI) imefanya maboresho kwenye mfumo wa ukusanyaji wa mapato ya ndani TAUSI kwa kuziunganisha mashine za POS zote za  Mawakala wa Nje  katika mfumo huo ili kudhibiti mapato.

Hayo yamebainishwa na Mkurugenzi wa Idara ya Serikali za Mitaa  kutoka TAMISEMI, Angelista Kihaga alipokuwa akifungua mafunzo ya kuwajengea uwezo Maofisa Mapato na TEHAMA wa Halmashauri  kuhusu mfumo huo   uliofanyiwa maboresho kutoka mfumo wa LGRCIS.

Amesema uunganishaji wa Mawakala wote ndani ya mfumo  wa TAUSI kutasaidia kupunguza matumizi ya  fedha mbichi na watalazimika kuweka fedha benki (float) kabla ya kukusanya  na pale wanapokusanya fedha hizo zitahamishwa  kwenye akaunti ya Mamlaka za Serikali za Mitaa.

“Matumizi ya Mfumo wa TAUSI kwa Mawakala utasaidia kufanya usuluhishi wa kibenki wa miamala kila siku ambapo kama kutakuwepo na  miamala ambayo itakuwa na changamoto itashughulikiwa kwa wakati kabla ya kupelekwa katika akaunti ya Mamlaka za Serikali za Mitaa, ” amesisitiza Kihaga

Pia amesema matumizi ya mfumo huo kutasaidia upatikanaji wa taarifa kwa Mawakala kwa wakati na kuwezesha madai ya kulipwa gharama  za uwakala kwa wakati.

Aidha,amewataka maafisa hao kuwa waadilifu na waaminifu katika kusimamia mfumo huo na kutoa huduma kwa weledi  kwa walipa kodi.