مشيرة موسى تكتب ” يا مسهرني ” ..

ليه كده بأااااه … راح فين النوم … مش بتكلم عن ال ١٠ دقايق نوم اللى بنخطفها او بتحل على الواحد وهو بيقرأ كتاب أو بيتفرج على التلفزيون … لأ لأ … بتكلم على السبع أو ثمان ساعات اللى الدكاترة بيطلعوا فى التلفزيون يقولوا عليها … الحاجات بتاعة صحتك ومزاجك والكلام الكبير ده … ومش بتكلم عن العينين اللى مجافيها النوم علشان ” الحب وسنينه” مثلا … لا بتكلم عن العينين اللى نفسها تغمض وتروح فى نوم عميق جدااااااااا … لا وايه كمان … شوف الطمع … تصحى لوحدها وبراحتها وقت ما تحب … ياااااه على الأحلام الكبيرة صعبة التنفيذ … اوعدنا يا رب براحة البال والصحة والقدرة على النوم العميق اللى بمزاج … زمان وانا أم صغيرة … يعنى من حوالى ٥٠ سنة كده إلا قليلا … كان لما حد يسألنى ” نفسك فى ايه ” … كنت اقول بدون تفكير … نفسى انام واصحى براحتى … وأعتقد ان دى أمنية اى أم عندها عيال صغيرة … كنت عارفة الشعور ده علشان كده لما كنت بروح اشوف احفادى … كنت اول ما اوصل اقول لمرات ابنى … سيبى العيال وادخله نامي … ما هو قلة النوم بتخلى الواحد تعبان وعصبى … أو على رأى الستات الحلوة اللى بيطلعوا فى التلفزيون … قلة النوم بيأثر على البشرة وحيويتها … يا حلاوة يا ولاد … طبعا فى اسباب كتيييييير لقلة النوم … منها ال ” فكر ” على رأى الناس الكبيرة بتاعتنا … ربنا يهدى بالكم ويبعد عنكم الفكر … ومنها الآلم … ربنا ينعم على الجميع بالصحة ويشفى ويعافي كل صاحب مرض … اما السهر اللى بييجي بعد مرحلة الإفاقة واستيقاظ الضمير … يعنى بعد حد ما يفوق من عمايله السودا … فده ربنا معاه باااه وعليه بكثرة الاستغفار … وفى حد اعرفه بيخاف ينام بالليل احسن ملك الموت ييجى وهو نايم … وكأن ملك الموت لا يأتى الا ليلا … طيب بااااه نرجع لشخصي المسالم … اللى مالوش دعوة بأى كلام قلته من شوية … عايزة انام نوم عميق … انا مش باخذ مهدأت او منومات … الست ام كلثوم على الراديو … رفيق السهر … بتسأل ” ماخطرتش على بالك يوم تسأل عنى … وعينيا مجافيها النوم ” … يا عم شكرا … اللى يسأل يسأل اهلا وسهلا … واللى مش فاضى يسأل … بألف سلامة … أو بناقص … العقل السليم فى الجسم السليم … وسليم ده ييجى ازاى من غير نوم كفاية … ملحوظة … لم اذكر حالة السهر اللى بمزاج … يعنى سهر الفرح والهنا … علشان دى حالات محددة بتحصل ” كل حين ومين ” … ربنا يكتر افراحكم ويسعد قلبكم … بس انا عايزة انام … نوم عميق … من اللى بيحافظ على البشرة والحيوية والنضارة …