على رأى اللى قال | خمسة وخميسة

على رأى اللى قال “العين فلقت الحجر” .. خمسة وخميسة .. خرزة زرقا على شكل عين .. كل دى حاجات “سلو بلدنا”
أننا بنستخدمها علشان تحمينا من الحسد .. بس عمرك فكرت خمسة وخميسة دى جاية منين .. وليه الخرزة الزرقا ليها كل الإحترام ده .
أنا اقول لك .. خمسة وخميسة اللى بتلاقيها متعلقة فى بيوت وعربيات كتير لحد النهاردة .. وبتترسم على الحيطان .. وعلى أبواب البيوت هى رمز بسيط جدا لكف الايد .. والحواس الخمسة .. فالموروث الشعبى بيقول أن كف الايد هو اللى بيبعد الاذى علشان كده هتسمع كتير جملة “يا ساتر .. ايه الست اللى عينيها مدورة و وحشة دى .. وتلاقى اللى بتقول الجملة بترفع كف ايدها فى اتجاه وش الست اللى خايفين من عينيها .. وبتقول خمسة وخميسة …. هى كمان رمز للحواس الخمسة والمقصود منها أن كل حواسى منتبهة للى هتعمله .. وان أنا واخدة بالى كويس من عينيكى الوحشة … وفيه كلام تالت بيقول ان السر فى الرقم خمسة .. لان كل رقم له طاقة .. والرقم خمسة هو طاقة حماية.
” الخرزة الزرقا” بقا ممكن تلاقيها لوحدها على شكل عين .. وممكن تلاقيها مع الخمسة وخميسة يا اما متعلقة فى الصوابع .. او حاجزة مكان مميز فى نص الكف .
طب ليه الخرزة الزرقا وإيه حكايتها؟
الحقيقة فى أكتر من حكاية عن الخرزة الزرقا .. الأولى بتقول أن الرومان لما احتلوا دول البحر الأبيض المتوسط ومنها مصر الناس فكرت فى رسالة تخوفهم وتقول لهم أن اللى هيقرب مننا مش هنرحمه .. علشان كده بقوا يعملوا كف الايد رمز الحماية والدفاع عن النفس وفى وسطها خرزة زرقا رمز عيون الرومان .. والمعنى هنا أن أى رومانى هيقرب من بيوتنا هنقلع عينيه بإيدينا .
وفيه حكاية تانية بتقول أن دى موروث من أيام جدودنا قدماء المصريين .. وبيأكدوا ده بكمية الخرز الازرق الرهيبة اللى عثر عليها اللى بينقبوا عن الآثار .. وقالوا ان مافيش بيت مصرى او شخص من قدماء المصريين ماكانش لابس عين زرقا فى رقبته ومعلق واحدة تانية فى بيته … والسر ورا اللون الأزرق كان سببه ان قدماء المصريين كانوا بيخافوا من أصحاب البشرة البيضا والعيون الزرقا وشايفين انهم أصل الشرور .. وكمان اللون اللى اختاروه للعين علشان تحميهم هو لون السماء اللى بتسبح فيها الشمس والمايه العذبة اللى بتدى الحياة للناس .
وأعتقد أن الحكاية دى هى الأقرب للحقيقة .. لأن اللون الازرق كان لون اختراع مصرى خالص و مهم جدا عندهم .. والزخرفة على جدران المقابر والمعابد شاهدة على ثبات اللون اللى اخترعه المصريين.
ايوووة فعلا اخترعناه وبطريقة علمية جدا .. وكانت النتيجة هو إنتاج أقدم مادة محضرة صناعيا فى التاريخ وهى المعروفة لحد النهاردة بإسم “الأزرق المصرى” … والتركيبة كانت عبارة عن كمية محددة من النحاس ومعاها كمية تانية من البرونز مضاف لها رمل وملح النطرون وتتسخن فى درجة حرارة بتوصل لـ 1000 درجة .. ورغم ان التركيبة دى مصرية خالصة الا ان جدودنا كالعادة علموها لكل الدنيا وماخبوش سرها .. بالعكس كانوا بيصدروا المكونات بتاعتها علشان أى شعب على وجه الارض يقدر يستفيد من التقدم ده واللى وقتها كان ممكن يتقال عليه خيال علمى .. وكانت طفرة تكنولوجية عظيمة.
طيب يعنى هو ده بس الدليل الوحيد على أن أصل الخرزة الزرقا اللى شكل عين جاى من مصر القديمة؟
بصراحة لأ .. فيه حاجات تانية كتير منها مثلا أن ايزيس وازوريس وابنهم حورس كان رمزه العين .. وكان هو إله السماء والحامي لحكام الصعيد ، وهتلاقى كل تماثيله والرسومات بتاعته على هيئة صقر واقف برجل على نبات البردي شعار الدلتا، ورجله التانية على شكل ايد بشرية ماسكة حبل .. وكل دى دلالات على ان حورس هو حامى الحمى .. علشان كده بقت عينه هى الرمز الحامى .. وبقا حتى ملوك قدماء المصريين بيتحط على توابيتهم ومومياواتهم عين حورس علشان تحميهم فى رحلتهم للعالم الآخر زى ما كانت بتحميهم فى الدنيا.
من الآخر وعلى رأى اللى قال عين الحسود فيها عود ..
حلقتنا خلصت لكن قبل ما اسيبكم عايزة اقول لكم ان اليونسكو اعترفت بالخرزة الزرقا .. والكلام ده كان سنة 2014 وتم ادراجها ضمن مجموعة من القيم الثقافية والتراثية ومسجلة بإسم «ثقافة الخرزة الزرقاء».
و من الآخر وعلى رأى اللى قال عين الحسود فيها عود ..