محمد محمود عيسى يكتب : الشلل والمصالح والموائمات ومستقبل مصر
مشكلة مصر يا فندم في لوبيات الشلل والمصالح والمكاسب والموائمات. اللي يقدر يقتحم الحرب دي وينتصر فيها هيكسب مصر كلها يكسبها بحاضرها ومستقبلها .يا فندم إحنا مشكلتنا مش في الأخطار الخارجية ولا التهديدات ولا المخاوف دي كلها لأن كل ده ليه حسابات وتوازنات وموازين قوى ومع تقدم العصر الحديث والتكنولوجيات المتقدمة والعالية أصبحت إلى حد كبير جدا توازنات القوى معروفة للجميع لكن إحنا مشكلتنا الحقيقية والخطر الحقيقي اللي بالفعل بيواجه البلد وبيهددها في حاضرها ومستقبلها هو لوبي الشلة في مصر لو قدرت تقتحم لوبي الشلة وتقضي عليه تماما أؤكد لك أن مصر هتنطلق وبقوة وفي كل المجالات وهترجع قاطرة العلم والثقافة والمعرفة وأداة تشكيل وعي وعقل ووجدان الشارع العربي من تاني لو قدرت تقتحم ثقافة وفكر وتغلغل وسيطرة الشلة في كل مكان هتشوف بجد مصر تانية خالص هتشوف مصر الحقيقية هتشوف مصر اللي كلنا بنحبها ونتمناها هتشوف مصر اللي كلنا بنفخر بيها هتشوف مصر في كل حتة في مصر هتشوف فن ورياضة وثقافة وتعليم وهتشوف إعلام وصحافة هتشوف مسرح وتسمع أغاني وهتشوف مسلسلات وكمان هتشوف دين جديد هتشوف مصر تانية خالص وهتشوف اقتصاد سلعي استهلاكي مصري حقيقي مختلف تماما عن اقتصاد الاحتكار والجشع وجمع الأموال وهتشوف ناس مصريين كانوا بعيييييد خالص واقفين في أخر الصف واقفين في الضلمة خايفين هتشوفهم المرة دي في أول الصفوف ومنورين هتشوف في كل قرية مصرية محمد صلاح وهترجع أم كلثوم وعبد الوهاب وعبد الحليم من تاني هيرجع توفيق الحكيم ونجيب محفوظ ويوسف إدريس وغيرهم كتير هتشوفهم ماشيين جنبك في الشارع هيرجع مصطفى إسماعيل والحصري والمنشاوي وعبد الباسط هترجع إمبراطورية التلاوة المصرية من تاني بالفعل يا فندم هتشوف مصر في حتة تانية خالص وحاجة تانية خالص يا فندم لو تقدر تحرر مصر من الشلل والمصالح والموائمات هتكون نفذت أكبر عملية تحرير في تاريخ مصر الحديث وهتكون خضت حرب وانتصرت فيها بعظمة وانتصار نصر اكتوبر المجيد…. لو قدرت تهدم معبد الموائمات وتبني صيغة جديدة مصرية عصرية حديثة هتكون دخلت التاريخ من أوسع أبوابه لأنك بتبني بالفعل مصر الحديثة يا فندم مصر محتاجة صيغة جديدة بلغة وفكر العصر الحديث عصر الذكاء الاصطناعي عصر الفكر والعلم والتكنولوجيا عصر الشباب الجديد إللي لازم يقرأ ويتعلم ويفهم واللي أصبح بيسبق العصر بخطوات وأميال سريعة ولازم احنا كمان نسايره ونحاول نسبقة
ربنا يحفظ مصر وجيش مصر وقائد مصر فخامة الرئيس عبد الفتاح السيسي
