عبر الإعلامي أحمد موسى، عن استيائه من الارتفاع غير المبرر لأسعار الأرز مطالبا الحكومة بالتدخل من أجل ضبط الأسعار.
وقال موسى في مداخلة هاتفية مع برنامج “على مسؤوليتي” المذاع على قناة “صدى البلد”: ” رسالة إلى الدكتور مصطفى مدبولي رئيس مجلس الوزراء؛ عندنا أزمة كبيرة الكام يوم اللي فاتوا حضرتك عارف أن احنا اليومين دول عندنا بشاير رز وفي ظل الحصاد والبشاير أسعار الأرز ارتفعت ودا أمر مش طبيعي”.
وأضاف: “الأسعار زادت في الطن ما بين 700-1000 جنيه؛ الموضوع ده معناه أن عندي أزمة في متابعة بعض المزارعين أو بعض التجار؛ الناس بيخزنوا الرز لحد الكام أسبوع اللي جاي”.
وتابع: “الدكتور علي المصيلحي أتكلم في كذا جولة عن الرز وقال إن احنا خلاص في شهر تسعة والرز جاي ومعندناش أزمة والمفروض على أرض الواقع ده صحيح ولكن اللي حاصل على الأرض غير دقيق بمعنى أيه؟ لما يزيد سعر الرز النهاردة وامبارح وأول امبارح؛ والزيادة لا يمكن أن تحدث والمفروض متحصلش ولا يحصل جنيه زيادة”.
وأكمل: “في ناس خزنوا الرز في 3-4 محافظات معروفين اللي عندهم بشاير رز أنا بطلب من دولة رئيس الوزراء مع التموين ينزلوا المفتشين من دلوقت ويروحوا على المخازن المعروفة؛ أنت عندك 5 فدادين هيدوك 20 طن أرز لقيت عندك 40-50 أو 100 طن أنت ليك 20 طن انتاجك والباقي ده جبته منين؟”.
وواصل: “اللي بتكلم عليه ده عاملنا الارتفاعات؛ بدأوا يلموا خزن ويلا عندك ونبقي احنا بنتحكم في السوق؛ والله العظيم اللي بيحصل ده عيب؛ أحنا زراعين السنادي مليون و750 ألف فدان واحنا احتياجاتنا مليون و200 ألف فدان وفي الأخر نلاقي الرز غالي والطن بيزيد؛ الحد الأدنى للطن زاد من 700 إلى 1000 جنيه؛ يرضي مين دة وأنا بتكلم النهاردة عن ارتفاع ذاتي”.
واختتم: “المطلوب الرقابة والمتابعة، أروح للناس وأنا بفتح ومش عيب والكميات الزيادة اللي متخزنة تتصادر؛ عشان محدش يكرر الموضوع دة تاني؛ الرز النهاردة سلعة استراتيجية زي القمح متسبهاش أن حد النهاردة يتاجر بقوت الناس؛ دولة لازم الحكومة تتحرك؛ المحتكر ده أعامله إزاي؟”.
