تحدثت فيروز عن احدى ذكراياتها التى لا تنساها لاحدى المجلات الفنية فروت قصة طريفة للغاية حدثت فى فيلم دهب وقالت : ـ كان المفروض إن فيه مشهد من المشاهد هتلبس فيه فستان سهرة.. فـ« أنور وجدي» اتفق مع مصمم أزياء أنه يصمم لها فستان شيك بمواصفات وضعها انور وجدى بنفسه .. وبقى الراجل كل ما يعمل تصميم مايعجبش أنور فيرجع يصمم واحد تانى لحد ما أنور قال بس .. هو ده..
وفجأة والراجل شغال وبينفذ الفستان.. انور غير رأيه وقاله شوف تصميم تانى.. ورجع المصمم يصمم لحد ما أنور اختار التصميم رقم 12.
خلص تصميم الفستان وصناعته .. ولبسته فيروز وصورت بيه اول مشهد.. وبعد ما خلصت راحت قعدت على كرسي تستنى لما يظبطوا اضاءة المشهد اللى بعده.. واول ما جات تقوم.. الفستان شبك فى مسمار واتمزع.. فأنور غضب وقالهم هاتوا لى المصمم بسرعة.. فبعتوا جابوا المصمم بسرعة وقاله لازم تخيطة وتعالجه بحيث ان الخياطة ما تبقاش باينه..
وهنا المصمم لقاها فرصة علشان ينتقم من انور بعد ما تعبه وخلاه يعيد التصميم ١٢ مرة.. فقاله لا مش هينفع يتصلح لازم نعمل واحد تانى وده هيحتاج 3 ايام..
طبعا انور كان هيغمى عليه.. لان 3 ايام يقف فيهم التصوير هيكلفه كتير كمنتج .. فقاله معلش شوف لى حل سريع.. لكن المصمم صمم وقال هما 3 ايام يعنى 3 ايام.. ففيروز زى ما بتحكى قالت له معلش خلصه دلوقتى .. فالراجل استجاب لرغبتها وظبط لهم الفستان..
فى مرة تانية راحوا يصورو بنفس الفستان مشهد فى القصر.. والراجل صاحب القصر كان موافق على مضض أنهم يصوروا عنده .. وقالهم تنجزوا بسرعة.. وكان المفروض ان فيروز بتجرى فى المشهد ده جوه القصر.. واول ما بدأت تجري مخدتش بالها ان الجناينى راشش الممر اللى بتجري فيه فوقعت والفستان اتطين واتقطع.. وهنا لقى انور نفسه قدام ورطة تانية.. لان مفيش وقت والراجل صاحب القصر مش هيستنى عليهم.. فجه المصمم وعالج الفستان سريع سريع وعدت الليلة على خير..
وقتها بدأ انور يراجع السيناريو فلقى ان فيروز هتصور بالفستان ده عشرين مشهد لسه… فبعت جاب المصمم .. وطلب منه يعمل 3 فستاين زيه بالظبط علشان يبقوا احتياطي معاه لو حصل اى حاجة.. وجه المصمم .. وصمم ونفذ ال 3 فساتين.. ورغم كده ما احتاجوش بعدها ولا فستان فيهم لان فيروز صورت باقى المشاهد بالفستان الاولاني.. الفستان الملعون رقم ١٢
