مشيرة موسى تكتب: الكتاب والقهوة والنوم

زمان … زمان جدااااا … وانا صغيرة … كنت امسك الكتاب ما اسيبوش الا لما اخلصه … كنت عاشقة للكتب والروايات والمجلات والجرايد … كنت عاملة اشتراك من مصروفى فى مجلات للديكور والمرأة فى مكتبة افريمانز فى الكوربة بمصر الجديدة … لدرجة ان ابويا حبيبى اختار يهادينى ايه هدية عيد ميلادى وانا فى الاعدادية ( ١٣ سنة ) … اوعوا تضحكوا … الأعمال الكاملة لويليم شكسبير والاعمال الكاملة لاوسكار وايلد … لما كبرت شوية كنت باعرف أنقى الكتاب اللى هينفعنى … فى الجامعة درست الأدب الإنجليزى واتخصصت فى الترجمة والترجمة الفورية … لكن فضلت هواية وعشق القراءة والكتاب لا تفارقنى … كنت ادخل السرير بالليل ومعايا كتاب … وامى تقعد تحذرني ان عينيه هتضعف علشان قعدتى غلط فى السرير … كبرت شويتين ونوعية القراءة كبرت معايا وزادت الاهتمامات … واقترن بالهواية دى شرب القهوة … كل أنواع القهوة السادة … الاستعداد للنوم يعنى كتاب وقهوة وقعدة فى السرير لحد ما النوم ييجى … الموضوع ده لسه مستمر بس زاد عليه عنصر مهم لا يمكن الاستغناء عنه هو ” النظارة ” … افتكرت حكاية عايزة احكيها مش عارفة ليه … يمكن للتوعية … والأولاد صغيرين كان ابوهم بياخذهم يوم الخميس بالليل ويرجعهم يوم الجمعة بعد الصلاة … المهم يوم الجمعة الصبح كنت باصحى رقبتى معووجة ومش فاكرة بصراحة قفلت الكتاب امتى ولا قفلت النور امتى … لكن حصل مرة فى يوم خميس بالليل وقبل ما اغيب عن الوعى بثانية حسيت بنفس الست اللى بتساعدنى فى البيت وهى بتقرب من وشى وتشوف انا واعية ولا خلاص … وعرفت كده انها بتحط حاجة فى القهوة بتاعتى … انا الحقيقة لحد دلوقتى مش عارفة هى كانت بتخرج ولا بتجيب صاحبها فى البيت … لكن الأكيد تانى يوم الصبح مشيتها وقلت لها انى انا والاولاد هنقعد فى بيت أهلى شوية … وطبعا غيرت المفاتيح … وبطلت خالص فكرة ان حد ينام فى البيت معانا … على فكرة انا بس بحذر … احنا طول عمرنا كان فى ” دادة ” محترمة ومسؤولة بتبات معانا فى البيت … ربنا يسلم الجميع …
نرجع بأااااه للكتاب والهواية اللى للأسف كتيييييير من الشباب ما يعرفهاش … الكتاب دلوقتى اصبح سلعة استفزازية … وانا بأحب امسك الكتاب فى ايدى … اشم ريحة الورق والحبر … اقلب صفحة صفحة … والنظارة النظارة النظارة … اقول لكم ايه … نظارة فى الشنطة ونظارة جنب السرير ونظارة جنب الكرسى الليزى بوى اللى قاعدة عليه فى هذه اللحظة … النظارة اصبحت مرتبطة ارتباط وثيق بالكتاب والقهوة بعد ما تراجع فى القائمة بند النوم … وعايزة اقول لكم كمان سبق بند النوم كمان بمراحل كثيرة جدااااااااا … لعبة على الاى باد اسمها ” word ” لعبة بيكتبولك فيها كل مرة ٧ أو ٨ حروف علشان تطلع منهم حوالى ١٠ كلمات مختلفة … هما بيقولوا اللعبة دى بتبعد عنا مرض الزهايمر … ربنا يكفينى ويكفيكم شر كل الأمراض …