مشيرة موسي تكتب : ” مش جوازة وخلاص

سأل المذيع احدي الفنانات “لا اعرفها حقا ” عن فتي أحلامها … فقالت ” نفسي اتجوز وائل الدحدوح ” وأضافت مؤكدة ” لأ دا راجل … الدحدوح ده راااجل ” … طيب يعني ايه كلمة “راجل ” اللي قالتها الست دي … وايه اللي عجبها في الدحدوح علشان تنطق كلمة راجل وهي بتركز علي كل حرف في نطق الكلمة كده … الست لم تطلب المال … لم تطلب مرجان وياقوت … لم تطلب قصر مش عارفة فين … وشهر عسل في المالديف … نتكلم جد بااااااه … ايه اللي الست ممكن تطلبه في زوج المستقبل … مش ممكن انكر اني شوفت بعيني … إن هناك من البنات “الملعونات ” … يخططن للزواج من الشباب بدون خبرة … يخططن للانجاب بسرعة … يخططن لطلب الطلاق … ثم يخططن للاستيلاء علي شقة الزوجية باعتبارهن ” حاضنات ” … للأسف وللأسف جدا بينجحوا … انها الجريمة الكاملة في نظري … انا اتكلم عن طلبات واحلام ” بنت الأصول ” … علما ان بنت الأصول مش لازم تكون هي البنت الحلوة الغنية … سألت البنات اللي اعرفهم … عن أحلامهم … عن طلباتهم … الحقيقة … ربنا يحميهم … هما مش مستعجلين … مش جوازة وخلاص … ممكن اقول انهم محققين ذاتهم … ناجحين يعني… علي رأيهم … ” مش عايزين نتجوز علشان نطلق ” … زي ما بيقولوا … – انا عايزة اتجوز راجل محترم … مش راجل ” بيريل ” علي اي ست يشوفها … – انا عايزة اتجوز راجل واثق في نفسه وفي انا. كمان … يعرف يعني ايه يتعامل باحترام معايا … يعني الغيرة اللطيفة مش الشك القاتل … – انا عايزة اتجوز راجل فاهم … ممكن نختلف طبعا ده طبيعي … لكن في أسس للاختلاف والحوار … – انا عايزة راجل يحافظ علي وعلي أولادي… الخلاصة المفاهيم اتغيرت … القدرة المالية علي فتح بيت … ده شئ اساسي طبعا … الموضوع مش ” عش العصفورة يكفينا ” … الموضوع اكبر من كده … لكن التفاهم ولغة الحوار المشتركة والاحترام مطلوبين … ارتفاع معدلات الطلاق بتدق ناقوس الخطر … القضايا امام المحاكم بتدق ناقوس الخطر … معاناة الأطفال واحساسهم بالضياع بيدق ناقوس الخطر … والحقيقة … انا خايفة من حالة الضياع دي … انا من جيل عرف حالات استقرار الأسرة … جيل عرف أهمية تربية الاولاد … انا شفت الزوج اللي بيمسك ايد مراته وهما بيعدوا الشارع … شفت الزوج اللي بيسند مراته وهما بيتمشوا … شفت وعرفت معني ” الأسرة البسيطة السعيدة ” اللي ربت رجالة محترمة … وطبعا ستات محترمة …