مشيرة موسى تكتب ” ١٠ رمضان “

كل لحظة وانتم طيبين … وبعودة الأيام … العاشر من رمضان يوم عظيم على قلب كل مصرى … يوم عوضنا عن كسرة القلب اللى كل جيلى عاشها … مش عايزة اكرر كلام قلناه وزدناه عشرتاشر الف مرة من فرحتنا …بس لسه نفسى فى فيلم مصرى حقيقى … قصة حلوة من القلب … إنتاج محترم … ومخرج مجنون يبكينا ويفرحنا فى نفس الوقت … فيلم يخلى “عيال الأيام” دى يخرجوا يهتفوا من قلبهم ” انا مصرى وافتخر ” … حضرت حلقة نقاشية يوم الاثنين اللى فات فى ” بيت السنارى ” بدعوة كريمة من الدكتور احمد زايد مدير مكتبة الاسكندرية بعنوان ” دور الفن والإبداع فى تشكيل الهوية الثقافية ” … موضوع يستحق اكثر من حلقة نقاشية واحدة … منتظرين كتيييييير من الفن ومن الإبداع الحقيقى الوطنى … فجأة وصلنا ليوم ١٠ رمضان … تصدقوا. ثلث رمضان طار … ربنا يتقبل منا الصوم وصالح الأعمال … قولوا آمين … ناس زمان كانوا بيقولوا على رمضان … عشرة مرق وعشرة خلج وعشرة حلق … طبعا شبابنا مش هيفهموها دى … اقولكم أنا … العشرة الأولى طارت فى الأكل والعزايم والذي منه … والعشرة التانية مخصصة للخلج يعنى هدوم العيد والاستعدادات للعيد … ربنا يعين الاهالى … على ايامى كان كل يوم عيد له لبس جديد … كانت أيام جميلة فعلا … اما العشرة الاخيرة … فكانت للحلق … يعنى كحك العيد … ما احلاها أيام… الكحك كان بيتى … الله يرحم جدتى … احلى كحك بالسمن البلدي… الكحك ده محتاج مقال لوحده … كل ما حد يشوفني يسألني … بتتابعى ايه … الحقيقة ولا حاجة … انا من فترة توقفت تماما عن متابعة المسلسلات … بحاول احافظ على عقلى ومزاجى بصفة عامة … لكن لا انكر اننى افضل الراديو عموما … وبازعل من هيافة بعض المذيعين والبرامج فى اوقات. كتيييييير … الله يسامحها بأااااه الواسطة وسنينها … اخيرا … مش قصدى انكد عليكم … بس من اول رمضان … فى ناس اعرفهم واكيد فى ناس ما اعرفهاش فقدوا عزيز على قلبهم … أوصيكم بجبر الخواطر … يعنى نراعى المشاعر شويتين … ولو فى عيال صغيرة … أجبروا بخاطرهم وراضوهم ربنا يكرمكم … شعور صعب جدااااااااا … شعور فقد عزيز غالى …