مشيرة موسى تكتب : “الأصول” .. فى البيت والمدرسة أيضاً

احنا جيل اتعلمنا الاصول مش بس في البيت لكن كمان في المدرسة الحمد لله…كان لسه عندنا مدرسات انجليز لما دخلت المدرسة وانا عندي ٤ سنوات… ‘ مسز جيد ‘ كانت أيقونة في العلم والجمال والادب والكمال بكل أشكاله… المرة دي مش هتكلم عن مدرسات زمان…ده محتاج دردشات كتيييير …لكن هتكلم عن بعض ما تعلمناه علي ايد مدرسات زمان…حاجة من أهم ما تعلمناه هي طريقة الكلام…المشي…القعاد…وحتي الضحك…
ايوه والله… Girls are to be seen not heard ….ايوه يا قمرات…لازم تكونوا زي النسمة….يعني نمشي مانزحفش وصوت الشبشب ولا الجزمة يصحي الجيران اللي ساكنين تحت… صوتنا لازم يكون مسموع لكن مش صريخ….في حالة القعاد والمشي الظهر لازم يكون مشدود ورأسك مرفوعة…اما الضحك فلازم يكون في شكل ابتسامة أو ضحكة لطيفة غير مبالغ فيها…
ليه الكلام عن تعليم زمان والحاجات القديمة دي…لأن بعض البنات اللي بقينا نشوفها دلوقتي في المول أو الكافيهات أو حتي في الشارع …للأسف … بقينا احنا الكبار مش عارفين نعتبرهم مسخ بنات ولا مسخ صبيان ولا ستات قرشانة لابسه ماركات ومكياج لا تناسب السن والبراءة…
لما كنت بدرس في كلية الإعلام…كنت بانصح البنات…كل كلمة خارجة منك لازم تكون واضحة …ليه… علشان المهنية …علشان ما تتعرضيش للتنمر…والأهم علشان ميجيش واحد مريض يقولك(تعالي يا حبيبتي اقعدي جنبي،علشان مش سامعك).
نيجي بأااااه للهزار مع الصبيان…طول عمرنا في البيت والغيط كان معانا صبيان…في المدرسة…في النادي…مع الأقارب…عمرنا ما كنا بنهزر بالأيدي…الولد لازم يحترم البنت… وطبعا العكس كمان…يعني غير مقبول ان ولد يشد كرسي من تحت بنت …فتقع علي الارض وتقوم تضربه…
اما الضحك…وما ادراكم ما الضحك… وانتم في البيت اعملوا اللي انتم عايزينه…لكن حتي الضحك له اصول…الجديد بأااااه بالنسبة ليه…والظاهر والله اعلم ان الضحك والكركعة بصوت عالي…اصبح شرط للتعيين في الاذاعة ….اسمعوا الإذاعة وقولوا رأيكم بصراحة…ينفع كده؟؟؟دي مش خفة دم…ده شئ سخيف ومستفز…متصل بيكلم مذيعة بيقول مراتي ماتت…الظريفة اللطيفة ترد بكركعة غريبة…موتها ازاي؟؟؟