علق الفريق كامل الوزير وزير النقل والمواصلات، على حادث سقوط كمر خرساني بمحور كمال عامر، الذي أدّى مصرع عامل وإصابة آخرين.
وقال خلال مداخلة هاتفية مع برنامج «على مسئوليتي» الذي يُقدمه الإعلامي أحمد موسى، عبر شاشة «صدى البلد»، مساء الثلاثاء: «فيه ناس لازم ترمي شوية تراب على الحاجة الحلوة.. ده حادث بسيط جدا في منزل كوبري الفريق كمال عامر».
وأضاف: “الناس قالت الحق كوبري وقع.. انهيار كوبري.. إعدام كامل الوزير.. ده صرف 2 مليار جنيه والكوبري وقع.. الكوبري موقعش ولا حاجة”.
وتابع: «أنا اللي مسئول عن كل كباري مصر.. والكوبري لم ينهر ولا حاجة.. وأحد الإعلاميين المصريين اللامعين الكبار قال المحافظة كان لازم تقول علشان محدش يعدي من تحت الكوبري علشان الكوبري ميقعش عليه.. الكوبري موقعش.. اللي وقع كمرة كان الونش بيركبها في منطقة معزولة».
واستكمل: «منطقة الشغل بيبقى معمول عليه أسوار من الصاج وبتبقى معزولة ومفيش أي خطر على الأهالي تماما.. الونش كان شايل كمرة في آخر مَنزَل للكوبري اللي شغال تجريبي».
ولفت إلى أنّ الكوبري لم يتم افتتاحه حتى الآن، ويعمل بشكل تجريبي، وقال: “اللي وقع كمرة بتتصبّن وكان الونش بيشيلها من 4 بنوز.. اتفك 3 بنوز والعامل كام بيفك الرابع، لكن تأخر شوية في فكه، فالكمرة مالت على جنبها.. ومعروف أن الكمرة بتشيل لما تكون واقفة على سيفها، لكن لما تنام على جنبها متشيلش.. فالكمرة اتقطمت ووقعت في المكان المحدد للعمل واللي مفيش اتصال بينه وبين الشارع، والعامل اللي هو توفى هو اللي العامل اللي كان بيصبن الكمرة».
وزاد قائلا: «الناس قالت إلحق، لازم نقتل كامل الوزير.. لازم نعدم كامل الوزير.. ده صرف 2 مليار.. افهموا وبصوا وحللوا واعرفوا إيه الخبر السليم اللي يتقال وإيه اللي ميتقالش»
