لواء مروان مصطفى بكتب : من حكاوي القهاوي.. مصر فعلاً هاتفلس !؟
سألت صديقي اللي فاهم كل حاجه..هي مصر فعلاً هاتفلس زي ما بيقولوا..!؟
اول لما دخل القهوه ..وقبل ما يقعد.. قلت له احنا كنا بنتكلم المره اللي فاتت عن الطبقات الاجتماعيه في مصر وتاثير الازمه الاقتصادية عليهم…!!
قال لي ..شوف يا سيدي الحكومه مش عارفه تاخد حق الدوله فئات معينه زي (تجار السوق السوداء والعمله ومقاولي الاوهام والمنحرفين من تجارالاراضي وغيرهم ، وزود عليهم كمان بعض لعيبه الكوره ، وعدد من الفنانين ومطربي المهرجانات .. وحتي اصحاب الشاليهات والشقق المفروشة وكمان العماله اليدويه والحرفية) ..بالرغم من دخولهم العاليه ..وعلشان كده الحكومه ما قدرتش غير على الغلابه من الطبقه المتوسطه اصحاب الدخول الثابته ومدخراتهم المحدوده والتي تراجعت قيمتها اكثر من 30% نتيجة لانخفاض قيمه الجنيه.
قلت له سيبك من ده كله ..انا عايزاعرف هي مصر هاتفلس فعلا..؟
لقيته زعق .. يا عم حرام عليك انت بتصدق الكلام اللي بيتقال ان مصر اقتصادها بينهار وعلى وشك الافلاس … ربنا اعطانا عقل نفكر بيه …. هو لما مجلس الذهب العالمي يعلن رسميا ان مصر اشترت خلال العام الماضي 47 طن ذهب ، وكمان اشترت السنه دي 44 طن ، وكمان 64 كيلو في الشهرين اللي فاتوا ليصبح احتياطي مصر من الذهب أكثر من 125 طن لأول مرة في التاريخ .
مش بس كده وكمان كشف المجلس ان المصريين ( اللي بيقولوا عليهم غلابه) صرفوا حوالي2.2 مليار دولار على شراء الذهب خلال العام الماضي وده بالرغم من الارتفاع الشديد لسعر الدولار وللسعر العالمي للذهب في الفترة دي ..يبقي هو ده الاقتصاد المنهار..والشعب اللي مش لاقي يأكل.
ازيدك من الشعر بيت.. في تقرير لبنك جولد مان سكس الامريكي صدر يوم 12 الشهر الماضي.. وذكر بالنص ان الاقتصاد المصري يتجه نحو المرتبه السابعه في اقتصاديات العالم متخطيا بذلك اقتصاديات العديد من دول اوروبا.. وده على فكره اللي خلى مجموعه البريكس تقبل مصر فيها وترفض عضويه دول تانيه كتير.
بلاش يا عم كل ده .. انت شفت التقرير الرسمي اللي قدمته مصر للبنك الاسيوي للاستثمارمن اسبوعين ووضحت فيه انها بتسدد كل الالتزامات المستحقه عليها في وقتها دون ادنى تأخير.. واعلنت رسمياً أنها سددت خلال العامين الماضيين (اعوام الازمه) حوالي 52 مليار دولار من الاقساط وفوايد الديون اللي عليها …(وده رغماً عن سحب حوالي 23 مليار من الاموال الساخنه من البنوك المصرية ).. وكمان سددت السنه دي حوالي25.5 مليار..كل ده وعايزيني اصدق انها بلد ها تفلس ومش لاقيه الدولار … يا عالم حرام عليكم ارحموا عقولنا بقي ..!!
واللي يؤكد اكترواكتر، ان الاحتياطي الدولاري لمصر زاد حوالي 875 مليون دولار في نص العام الحالي .. واصبح دلوقتي (بفضل الله تعالى ) 34.878 مليار وده من اصل 13 مليار دولار عام 2013 ايام الفوضى الخلاقه.. قصدي (الهدامة ) ونحمد ربنا ونشكر فضله ان مصر قدرت لاول مره بعد مازودت وحسنت انتاجها الزراعي تفتح اسواق جديده لصادراتها الزراعيه في اليابان والصين ونيوزيلندا واكتسحت منتجاتنا من (الموالح والبطاطا والبصل والعنب والفاصوليا ) دول العالم وارتفعت صادراتنا هذا العام لحوالي 16 مليار دولار … ده طبعا غير السياحه اللي (بفضل الله ) حققت السنه دي اكبر دخل في التاريخ حوالي 14 مليار دولار..
يا راجل خلينا نفكر بالعقل … هو في دوله فقيره ومفلسة يطلع رئيسها ( وفي عز الازمه الاقتصاديه) يأمربتطوير 4500 قريه علي مستوي مصر كلها ، وكمان يزود كل المرتبات والمعاشات ومعاشات الضمان الاجتماعي لمواجهه الغلاء، وكمان يبني اكبر ميناء علي البحر المتوسط في العريش ، ويوجه بسرعه الانتهاء من زيادة وتوسعه المواني والمناطق الحره العملاقة ..ويربطهم كلهم من شرقها لغربها بشبكه طرق حديثة خرسانيه .. ويوجه الحكومه انها تبني 100 مدرسه على احدث النظم المتطوره تبدأ فيها الدراسه العام الدراسي المقبل . ده غير حاجات تانيه كتيييييير … مش عارف ليه بننساها ؟
ليه محدش فكر لحظه ازاي بلد منهارة اقتصاديا زي ما بيقولوا (عملت ،وبتعمل ) ده كله ، ومحدش سأل نفسه هو ده مظهراو تصرفات دوله عندها ازمه اقتصاديه طاحنه ، او ده شكل شعب فقير غلبان مش لاقي يأكل .. زي ما خبراء الاقتصاد المغرضين بتوعهم بيذيعوا ويروجوا …علشان ينكدوا علينا ويحرضونا .
وللأسف الشديد احنا بكل سذاجة وعبط بنسمعهم ، وبنصدقهم..يمكن علشان محدش من الحكومة فهمنا الحقيقة أو شرح لنا الحكايه .. جايز علشان الحكومه بتخاف من الحسد … او بتثق في حكمه الشعب المصري وصلابته .. والي لقاء جديد بمشيئة الله تعالى وبركاته..
لواء / مروان مصطفى المدير الأسبق للمكتب العربي للإعلام الامني بمجلس وزراء الداخليه العرب.
