مهاب مهران سليم يكتب : أحلى أيام عمرنا
احنا الجيل اللى بدايه يومنا كانت 6 الصبح كان جيل بيبدأ يومه بصوت فاروق شوشة وقطرات الندى والموسيقى المميزة للبرنامج وبعدها صوت ام كلثوم فى الراديو وهي بتقول (يا صباح الخير يالى معانا الكروان غنى وصحانا)
ويا (ياحلو صبح ياحلو طل ياحلو صبح نهارنا فل) لمحمد قنديل ….
و بننزل على المدرسه و بنسمع فى الشوارع و راديو العربيه .. برنامج (صاحبتك السلامة) و كانت اغنيه التتر (بالسلامة يا حبيبي بالسلامة) تقديم أيات الحمصانى .
وكنا نعرف اننا اتأخرنا على طابور المدرسه اول مانسمع برنامج (كلمتين وبس) للعظيم الراحل فؤاد المهندس … 🙂
الجيل اللى كان بيستنى سينما الاطفال يوم الجمعه وبينبهر لما بيتفرج على (جولة الكاميرا) يوم الأحد مع هند أبو السعود
وبيخشع قلبه مع برنامج (العلم والإيمان) للدكتور مصطفى محمود.
الجيل اللى كان مصدق ماما نجوى إبراهيم لما بتزعل وتأنب بقلظ لما يغلط
الجيل اللى كان كله لازم يشترى مسابقة بم بم،
الجيل اللى انبهر بفوازير رمضان وألف ليله وليله للراحل المخرج فهمي عبد الحميد
احنا الجيل اللي كان حريص على شراء اهرام الجمعة وبريد الاهرام لعبد الوهاب مطاوع
واخبار اليوم وفكرة لمصطفي امين وعمود جلال الدين الحمامصي ونص كلمة لأحمد رجب
ومصطفي شردي والوفد ولو فيها رفد
هقول ايه ولا ايه بس على أحلى أيام العمر، ياريت أى حد من جيلى يفكرنا ويفتكر معانا أحلى ايام عمرنا
