محمد محمود عيسى يكتب: فيه ناس خسارتها مكسب

أوعى تجامل بنفسك على حساب حد أو تسمح لحد يعمل بيك دور واجب أنت أولوية كبيرة وأنت الأهم وأنت رقم واحد أنا مش بقولك خليك أناني أو بقولك دافع عن أنانيتك ولكن بقولك أحمي نفسك من الأعباء اللي ممكن تكون شايلها فوق كتفك طول عمرك من صديق أو قريب أو زميل في شغلك أو جارك وانت مش قادر تتخلص من العبء ده لما يتحول كل واحد من الناس دي لعامل ضفط نفسي عليك تخلص منه فورا ولما يتحول كل واحد من الناس لأزمة خانقة في حياتك تخلص منه فورا ولما يتحول كل واحد من دول لمشكلة بتطاردك في كل وقت تخلص منه فورا ولما يتحول كل واحد من الناس لأزمة مستمرة بتتعبك نفسيا تخلص منه فورا ولما يتحول كل واحد من دول لمشكلة بتاخدها معاك البيت وتؤثر على علاقتك بزوجتك وأولادك تخلص منه فورا ولما تتحول العلاقة بينك وبين الناس دي تحت أي مسمى إلى علاقة ابتزاز نفسي ومنفعة ومصلحة مادية بحتة هنا العلاقة دي أصبحت علاقة جافة قاسية صلبة علاقة صخرية أصبحت علاقة ميتة إكلينكيا  والتمسك بها نوع من المغالطة والكذب على النفس وخصم من رصيد حياتك وعمرك

فيه ناس خسارتها مكسب فيه ناس لما بتخسرها بتكسب راحتك فيك ناس لما بتخسرها بتكسب استقرارك فيه ناس لما بتخسرها بيرجع ليك هدوءك فيه ناس لما بتخسرها بتكسب صحتك قيه ناس لما بتخسرها بتكسب حياتك.

علشان كده قوى مناعتك بالمخلصين من حولك الأنقياء في حياتك الصادقين في علاقتهم معك بصدق وإخلاص ومحبة خالصة صادقة نقية طاهرة بريئة ومتقلش مفيش. الأصدقاء والناس في حياتك رزق من ربنا زي أي رزق ربنا بيبعته ليك ولو أنت أخلصت نيتك وصفيت قلبك وكنت متصالح مع نفسك ومع الحياة من حولك أكيد هيكون فيه حد في حياتك مخلص ونقي وصادق معك هيكون فيه حد في حياتك مكسب كبير ليك وعمره ما هيكون خسارة لكن زي ما أي حاجة في الدنيا فيها الجيد وفيها الرديء الناس كلها في حياتك على اختلاف درجاتهم فيهم الجيد وفيهم الرديء وانت مش مجبر أنك تتحمل الرديء ولا أنك تضحي بلحظة من حياتك علشان تتحمل بيها شخص من الناس دي.

خليك قوي وواضح وصريح مع نفسك وخلي عندك الجرأة أنك ترتب نفسك من جواك بشكل منظم ومرتب وصحيح.خليك فاكر أنك هتعيش حياة واحدة بس فعيشها زي ما انت عاوز مش زي ما الناس عاوزة لو فكرت أنك تعيش زي ما الناس عاوزة مش هتعرف تعيش وهتتحسب عليك حياة بالكذب متجاملش بنفسك وأوعي تدي حد الفرصة انه يعمل بيك واجب مع حد وافتكر ان فيه ناس ممكن تكون في حياتك حياة وفيه ناس خسارتها مكسب