عقب الإعلامي عمرو أديب على هزيمة الزمالك أمام البنك الأهلي بثلاثية في إطار منافسات دور الـ 16 لبطولة كأس الرابطة وتأهل الأخير إلى الدور ربع النهائي من كأس الرابطة.
وقال أديب، خلال برنامجه الحكاية عبر فضائية إم بي سي مصر أمس الاثنين: الزمالك لعب 17 مباراة اتغلب منها في 10، إحنا مش بنتكلم عن فريق، إحنا بنتكلم عن خرابة، 3 أهداف في 7 دقائق إمبارح وده رقم قياسي عالمي جديد.
وأضاف مقدم برنامج الحكاية: كل يوم فريق الزمالك بينزل التدريب مش عارف مين مدربه.. النهاردة عبد المقصود وبكرة عبد المعبود، متسائلًا: معقول تاني أكبر فريق في مصر مش عارف له مدرب؟.. ده شيء مهين وبايخ وشكله وحش، ليه بيتعمل فينا كده .. ليه الزمالك بيتهان؟
وتابع أديب: فيه طفل صغير نزل الملعب إمبارح والجماهير قالت مش بعيد يجيب الجول الرابع في عواد، اعملوا اللي أنتوا عايزينه في الزمالك بس المشهد ده ميتكررش ، حرام اللي بيتعمل في النادي ومقدرش أحمل اللاعيبة مسؤولية الهزيمة ، فيه ناس داخل نادي الزمالك مبسوطين بالهزيمة .. فيه مؤامرة في قلب النادي.
ضياع الزمالك ضياع لأموال الدولة
وأكمل الإعلامي عمرو أديب: الوضع من سيئ لأسوأ .. الفريق من غير إدارة كسب الدوري مرتين .. كفاية حالة الإنكار دي، متابعًا : رئيس النادي يرجع .. احتمال .. طب هاتوا لجنة تدير الفريق .. لما نشوف ، الفريق خارج المنافسة على أي بطولة، والدولة بتتفرج على انهيار النادي، مؤكدًا: نادي الزمالك إحدى مؤسسات الدولة وضياعه ضياع لأموال الدولة.
موقف وزير الشباب والرياضة غير واضح
وتابع عمرو أديب: موقف وزير الشباب والرياضة غير واضح، الوزارة خايفة تتخذ أي قرار ممكن يكون فيه نسبة خطأ، النادي مبقاش فيه غير خناقات وخلافات ومؤامرات وخزينة فارغة.. طب وبعدين.
بيعوا النادي وأعملوا مكانه مطاعم وحمامات
واختتم أديب حديثه: بيعوا النادي وأعملوا مكانه مطاعم وحمامات، هو الزمالك بيحكمه قانون ولا ملاهي ومراجيح؟، طبقوا أي قانون على الزمالك حتى لو قانون المرور بدل الفوضى، أو سيبوه يقع ويبقى خرابة وربنا يتولاه برحمته.
