مشيرة موسى تكتب ” ارحموا عيالكم ” …

عايزة احكى لكم عن حاجة اسمها ” الاحترام ” … واضح ان دى حاجة بقت ” عملة صعبة ” … ايه اللى بيحصل بين اى أتنين قرروا انهم ميكملوش جوازتهم … ايه كم الغلط ده … زمان قالوا حاجة عن ان الانسان بيبان معدنه فى وقت الخلاف … واضح ان وقت الخلاف بيطلع كم حاجات مالهاش دعوة لا بالتربية ولا بالتعليم … وطبعا لا يسعنا فى هذه المناسبة الا ان نشكر ” السوشيال ميديا ” على المجهود الرائع المبذول لنقل كل ما هو فاضح وجارح … واكيد لازم نشكر كمان كل الحبايب والأصدقاء اللى بيتبرعوا بحكاية الحكايات والفضايح بس علشان يدخلوا فى الصورة ويبقوا تريند … ويمكن لو ” جودوا شوية ” ربنا يكرمهم كمان ويتم استضافتهم فى برامج النميمة على شاشات التلفزيون … اعرف إباء استحلوا طلب المال علشان يطلقوا … وناس سحبوا كل الأجهزة من المطبخ علشان يطلقوا … وناس رفضت تدفع اي فلوس لعيالها … والحكايات كتييييييرة ومشينة … سؤالى لهؤلاء الرجال ام شنبات … مفكرتش فى عيالك اللى شايلين اسمك … الأغرب بأااااه الناس الشمتانة على طول ( اللى هما بالمناسبة لا من القرايب ولا الاصحاب ) … واللى بتطلع كل العقد والكلاكيع عندهم واللى بتظهر بوضوح فى الردود على اى بوست بيتم نشره يفيد نهاية اى علاقة بين اى اتنين … ربنا يستر علينا من نقص التربية … او الاصح اقول … ربنا يستر علينا من ال ” لا تربية ” … * واحدة صاحبتى بنتها قربت تخلف بنت … هى كانت بتسأل عن اسامى بنات … بالصدفة جالى بوست فيه اسامى البنات اللى حصلوا على بطولة الجمهورية للجمباز تحت ٧ سنوات … تالين / جوليسيا / ديالا / لينا / ملك / بيانكا / كارمن / جود / لارا / تيا / مريم / اوليفيا … بس خلاص … انا شوفت فى البوست ده تأثير المد الغربى على الثقافة والتراث المصرى … الموضوع ده مش منتشر فى المدارس الناشيونال والانترناشيونال بس … لا الاسماء الغريبة عننا دى وصلت لريف وصعيد المصرى … ومحدش يقول لى يعنى هما مش بنى ادمين … لا طبعا بنى ادمين واسياد الناس كمان … بس فى اسماء لو عرفوا معناها هيزعلوا جامد … ** واحدة من بناتى راحت تجيب رقم جلوس ابنها (ثانوية عامة ) … ادارة المدرسة قالت لها لازم تدفع ٤٦٥٠ جنيه … لما صوتها على … جابولها القرار الوزارى تشوفه … حاولت تدفع بالفيزا أو انستاباى … قالوا لها لازم ” كاش ” وان التوريد بيتم يومى … مع انى عارفة وسمعت من زمان ان كل حاجة بتتدفع للحكومة لازم تكون عن طريق البنك … واخر مرة كنت بطلع شهادة ب (٢٥ او ٥٠ جنيه ) كان لازم ادفعها بالكارت … وكان فى ست ( غلبانة معندهاش حساب بنكي ) كانت بتعيط وهى ماسكة الفلوس فى ايدها … ** بمناسبة الفلوس اللى بتتطلب فجأة قبل دخلة العيد والمصاريف … رخصة الكلاب اللى كانت ب ٥٠ جنيه من كام سنة زادت فجأة … الرخصة للكلب الواحد وصلت ١٣٠٠ جنيه على الأقل … وطبعا علشان الرخصة تطلع لازم يسبقها تطعيمات وأدوية للديدان وأدوية مضادة للحشرات والذى منه … لسه ما اتكلمناش عن الأكل وزيارات الدكتور لذا وجب التنويه … الكلام ده لهواة الاستعراض واللى بيجيبوا لعيالهم كلاب يلعبوا بيها فى الصيف … ولما يزهقوا منهم بيسربوهم أو يسيبوهم يموتوا من الجوع على شاطئ البحر فى نهاية الصيف … ارحمونا وارحموا عيالكم …