مشيرة موسى تكتب ” سنة بدون كذب ” …

بالذمة ينفع كده … يرضى مين الكلام ده … يعنى ازاى يعدى اليوم التاريخى ده واللى بييجى مرة واحدة فى السنة من غير ما نحقق المطلوب والمسموح والمباح … بالذمة ده كلام … بااااه يرضيكم علشان احنا لسه يا دوب خارجين من شهر رمضان الكريم … كل لحظة وانتم والحبايب طيبين … يطلع بالصدفة ان تانى يوم من عيد الفطر المبارك يوافق اول شهر ابريل … موعدنا السنوى المعروف مع كذبة ابريل … فالناس تستحى تكذب … وماحدش يعمل مقلب فى حد … ده كلام … طيب هنعرف نكمل السنة ازاى … من زمان جدااااا اتعلمنا فى البيت والمدرسة ان الكذب حراااام … اليوم الوحيد اللى كان الكذب مسموح فيه هو اول ابريل … اليوم الوحيد اللى الكاذب كان لا يعاقب فيه هو اول ابريل … طيب هنكمل السنة ازاى … طبعا انا باتكلم عن ” كذبة اليوم الواحد ” … مش باتكلم عن حالة ” الكذب منهج وأسلوب حياة ” … ابويا كان راجل دمه خفيف جدااااااااا … واحنا صغيرين كان بيعمل فينا مقالب لطيفة يوم اول ابريل … مقالب مش كذب … الحقيقة انا حاولت كذا مرة اعمل ” مقلب كذبة ابريل ” للأسف ” فشلت فشل ذريع ” … كان بيجيلى حالة من الضحك الهيستيرى … يعنى باكذب وانا باقول بكل لغات العالم ” متصدقوش انا باكذب عليكم ” … علشان كده قررت التوبة … انا برضه عايزة أكد انى باتكلم عن كذبة اليوم الواحد مش عن مدمنى الكذب وهم كثر ” بضم الكاف ” … نرجع للعيد … زى ما ايام رمضان جريت ” العشرة مرق والعشرة خلق والعشرة حلق ” … ايام العيد كمان جريت … تصوروا العيد النهاردة خلص … يجعل أيامكم كلها أعياد … ويجمعكم دايما مع الحبايب … قولوا أمين … بس الحقيقة الشوارع رائعة وهى شبه فاضية كده ومن غير دوشة ومن غير كلاكسات … هو ماينفعش الناس اللى سافروا يعيدوا مع اهلهم فى البلد والناس اللى سافرت تحتفل بالعيد فى المدن الساحلية يفضلوا هناك شوية … منهم يكملوا انبساط … ومننا احنا الغلابة اللى قعدوا وما سافروش اى حتة نتبسط بالشوارع الفاضية شوية … يعنى بجد لو هما لازم يشتغلوا … مفيش مانع يشتغلوا ” اون لاين ” … ايه رأيكم فى الفكرة الجبارة دى … الموضوع ده عايز مصباح علاء الدين … انا افتكرت حكاية ” المصباح ” دى علشان لسه شايفة الفيلم فى سهرة اول ايام العيد … كل لحظة وانتم والحبايب طيبين ومتجمعين على خير دايما …