مشيرة موسى تكتب ” محضر شرطة “

اكيد انتو عارفين إنى مش بتاعة مشاكل ولا شغب … لكن اللي بيحصل ده كتيييييير والله … انا اصلا شخص متسامح وبفوت … يعنى بقول ومقتنعه ان ” الطيب احسن ” … أو على رأى جدتى لما حد كان يعمل غلط ” يسعده ويبعده ” … طيب تصوروا بأااااه لما شخص بهذه الصفات يروح القسم بنفسه وبكامل قواه العقلية علشان يعمل محضر … لا ومش اى محضر … محضر سرقة … اه والله محضر سرقة … صلوا على النبى كده … وادوني فرصة وانا هاحكى لكم الحكاية زى ما بيقول ولاد البلد ” من طقطق لسلامو عليكم ” … انا دخلت القسم مش فاكرة ازاى … بس اكيد بعد ما أخذت حبوب الشجاعة … وقلت انا فلانة الفلانية وعايزة اعمل محضر سرقة … تفاصيل ما تسألوش … معنديش إجابة … لكن فى ناس اهتمت … وفى ناس بدأت تكتب زى كلام الأفلام … الاسم زى اللى فى البطاقة والتاريخ والساعة … وجينا للسؤال المهم ” سرقة ايه ؟ ” … انا الحقيقة ماكنتش محضرة كلامى … لكن من نظرة اللى بيسأل واللى بيكتب … شكلهم افتكرونى مجنونة … انا قلت … وتقريبا ده كان نفس الكلام … ” انا يا باشا سافرت قبل رأس السنة بيومين مع صاحبتى … ملحوظة انا على ما أخذت الفيزا كانوا طلعوا عينى … طلبوا طلبات فيها تعجيز والله … لا مش بس كده دول طلبوها بالعربى والانجليزى كمان … المهم جه يوم السفر الطيارة كانت بدرى جدااااااااا … واللى يعرفني يعرف انى باصحى بدرى بس مش بحب اخرج بدرى … معلش سامحونى التفاصيل ساعات بتكون مهمة علشان العدالة تاخذ مجراها … الراجل المحترم شكله زهق من الكلام ده … وسألني ايوه ممكن نتكلم عن المحضر عايزين نكتب ” سرقة ايه ” … انا قلت ” ايوه حاضر ” … احنا أخذنا تاكسي للفندق والسواق طلع حرامى … هنا باااه صبر الراجل نفذ … ” يعنى السرقة كانت بره مش هنا … لسه هيقفل الورق وحسيت انه هيقول ” ورينى عرض اكتافك ” … انا وقفت وقلت لا انا مش ببلغ عن السواق … انا ببلغ عن سرقة تانية … على فكرة للعلم بس الناس بأااااه خلقها ضيق … فين لما كنا بيقرأ ” الشرطة فى خدمة الشعب ” … ما علينا … بصعوبة طلبوا منى اكمل … حاضر حاضر … هحاول اركز واختصر … خرجوني من المود الله يسامحهم … وبدأت من تانى ” احنا وصلنا الفندق وبعدين خرجنا ناكل حاجة … الجو كان برد جدااااااااا والدفايات فى المطعم كانت فوق راسنا … انا عرفت وحسيت انى أخذت برد اول لما خرجنا من الفرق بين سخونة الدفايات والجو البرد … ورحت الفندق وقعدت فى السرير الرحلة كلها … حتى احتفالات رأس السنة شفتها فى التلفزيون … ورجعت كملت اسبوع بحاله عيانة فى البيت … واضح ان الموجودين كلهم ومن عيونهم افتكرونى مجنونة رسمى … انا شفت ضحكات وابتسامات من تحت لتحت … وسمعت حد بيقول ” وبعدين ” بس بصوت غريب جدااااااااا ” … انا بدأت اضطرب كده … لكن كملت … من ساعة ما وصلت حضرتك … فقدت حبايب كتيييييير … حتى ما لحقتش اروح اودعهم … ناس كانوا قريبين لقلبى … واحد منهم طلب ووعدنى انه ييجى يشوفني ومشى فجأة … وسمعت عن عيال فى خناقات مدارس بتنتهى بدم وعمليات جراحية وحالات حرجة … وسمعت حكاية ولد صغير عامل جمعية بخمسة جنيه علشان يشترى مطواة … وسمعت عن عميل فى بنك موت ضابط واصاب اشخاص أبرياء … هنا بأااااه الراجل ما اقدرش يسمع اكتر من كده … وبنرفزة واضحة زعق وقال ” سرقة ايه يا ست ” … انا قلت له ” ما انا جاية لحضرتك فى الكلام اهوه ” … ” انا عايزة ابلغ عن سرقة ٣ اسابيع من عمرى اللى ما بقاش فيه كتيييييير اصلا ” … ٣ اسابيع هما الأهم فى السنة الجديدة … هما المدخل … هما المؤشر ” … هنا انا شفت الراجل قام وقف وهو غضبان … وقبل ما ينطق بكلمة ” اخرجى بره أو اقبضوا على الست المجنونة دى ” … لقيت ” بنجو ” كلبى العيان اللى بيشوف طشاش بعين واحدة واللى لسه عاملة له عملية بيصحينى برفق … هو طبطب عليه وكأنه بيقوللي … قومى متخافيش … شكلك حلمتى بكابوس …