محتاجين نرحم بعض شوية محتاجين نسند بعض شوية محتاجين نحس ونشعر ببعض محتاجين نقف وناخد نفسنا ونهدى ونفكر بهدوء وعمق هو ايه اللي بيحصل هو إيه اللى خلى الدنيا من حوالينا تتحول لساحة معارك ومكاسب وثروات وفلوس من غير حدود ومن غير عدد هو إيه اللى خلى إحساسنا ببعض يضعف وعند بعض الناس وصل لمرحلة الموت الإكلينيكي هو ايه اللى خلانا نقع من بعض في زحمة وصخب الحياة حتى اللي بيقع مننا محدش عنده استعداد يقف وياخد بإيده هو ايه اللي خلى بعض الناس دايما مش راضية ومش مبسوطة هو ايه اللي خلى بعض الناس دايما تبص لبعض وتحسد بعض على كل حاجة وعلى أي حاجة حتى وصل الأمر ببعض الناس انهم بيحسدوا الميت على جنازته وعلى الناس اللي ماشيين وراه وعلى الصوان الكبير الفخم والناس الكتير اللي جايه تعزي طيب ما هو مات خلاص وساب الدنيا وساب كل حاجة والدنيا بعده شغاله عادي متعرفش ايه اللي حاصل في ضماير الناس متعرفش ايه اللي حاصل في قلوب الناس متعرفش ايه اللي حاصل في نفسية الناس مع بعض مع ان الحمد لله الناس دلوقت عيشتها أحسن وظروفها المالية أفضل بكتير من زمان وفيه شباب ما شاء الله صنعت تاريخ مالي لأهاليها مكنش موجود أيام الأباء والأجداد ومع ذلك تلاقي فيه حالة كبيرة من النفسنة وعدم الرضا وبعض الناس عيونها في بيوت بعض وبعض الناس عيونها في جيوب بعض وبعض الناس بترصد وتراقب فيك الوقفة مع واحد صاحبك في الشارع أو حتى قعدتك مع واحد حبيبك أو صديقك ويطلع بسرعة واحد من البصاصين يقولك أكيد فلان ماشي مع فلان علشان بيعة أو شروة أو مكسب أو خسارة
زمان كان فيه فقر في الفلوس لكن كان فيه غنى في النفوس
ناس كتير من البصاصين بترصد وتراقب المنظر من بره ناس كتير من البصاصين بيغرهم المشهد الخارجي لبعض الناس ومش عارفه ولا مطلعة على خبايا وخفايا الناس والبيوت هو ليه المنظر الخارجي بس مش يمكن الراجل اللي انت بترصده وتراقبه وتحسده ده مريض ولا عنده ابن أو ابنه أو زوجه أو حد من اسرته مريض وتعبان وبيتألم وهو ساكت وصابر ومضطر يكون بالمنظر ده قدام الناس
واحد من كبار البصاصين قال لي: شوفت ولاد فلان كانوا ايه وبيقوا ايه دلوقت فلوس وملايين وابراج وعقارات
قلت له روح لربنا وقل له ليه اديت ولاد فلان وغنيتهم بعد ما كانوا فقراء بعدين هما سرقوا ولا كسبوا فلوسهم من حرام دي ناس تاجرت وكسبت وربنا كرمهم بالحلال ليه بتعترض على حكمة ربنا طيب ما تروح لبعض الناس اللي يمكن تكون عملت فلوس من حرام وظلم وسرقة وتقول لهم ليه عندكم فلوس وأموال كتيرة طبعا متقدرش تروح للناس دي ولا تتكلم عليهم علشان احنا مجتمع عنده انفصام في الضماير حرام عليك اتق الله وخليك في حالك وقل الحمد لله ومتبصش لحد لا لولاد فلان ولا لغيرهم خليك في حالك. قال لي يبقى انت شريكهم علشان بتدافع عنهم
مجتمع بعض الناس فيه ضمايرها محتاجة تروح عند سمكري سيارات علشان يعدلها على البارد والساخن
محتاجين نرحم بعض شوية
محتاجين نرحم بعض شوية محتاجين نحس ببعض شوية محتاجين نقف شوية من سباق الفلوس والمكاسب من كل حاجة واي حاجة محتاجين نهدى محتاجين نرفع عنينا عن بعض شوية محتاجين نهدى من جوانا محتاجين نصلح ضمايرنا ونطهر قلوبنا يمكن ربنا يصلح أحوالنا
” لو تراحم النَّاس لما كان بينهم جائع، ولا مغبون، ولا مهضوم، ولأقفرت الجفون من المدامع، ولاطمأنت الجنوب في المضاجع،ولمحت الرَّحْمَة الشقاء من المجتمع، كما يمحو لسان الصبح مداد الظلام. ” المنفلوطي
