مشيرة موسي تكتب عن ” الثقة والخيانة “

صديق عزيز حكي لي حكاية … الحكاية ضحكتني جدااااااااا … لكن كمان عيطتني جدااااااااا … ايه التناقض ده … طيب اسمعوا معايا واحكموا بنفسكم … الحكاية حقيقية حصلت في السنوات الاولي من القرن الحالي … موظف سكندري في الآثار … مظلوم يستحق الترقية لدرجة مدير … قرر ينزل القاهرة يقدم شكوي للأمين العام … في اللقاء سأله الأمين العام – “مين ممكن يؤيد كلامك ” … – رد الموظف بثقة وبدون تردد … فلان الفلاني … – خلاص روح هات ورقة من فلان الفلاني … تثبت كلامك … الموظف سارع بالسفر الي الإسكندرية … وهرع الي رئيسه … حكي له ما حدث … وطالبه بكتابة الخطاب … رئيسه سأله … يعني انت عايز جواب … حاضر بس كده … كتب الرجل شيئا ما … وأغلق المظروف وسلمه للموظف … الذي سافر بدوره مرة اخري الي القاهرة … ليقدم المظروف المغلق إلى الأمين العام الذي فتحه ليقرا ” اقتل حامله ” … كلمتين وبس … اكيد كانوا كافيين لسد نفس الموظف عن الحياة … هل أخطأ هذا الطيب في افتراض ان ينصفه رئيسه المباشر … هل اصبحت هناك أزمة ثقة بين البشر … هل اصبحت الطيبة … نوع من الهبل … زمان قالوا ” حرس من صاحبك ولا تخونه ” … يشرح المثل أحمد تيمور باشا في كتابه ” الأمثال العامية ” فيقول … اي احترس من صاحبك ولا تظن به الخيانة فذلك احوط لك وابقي للصحبة بينكما … الحقيقة بأااااه … اليومين دول … في ناس وصلونا لمرحلة ” احترس من الجميع” … طيب ليه كده ؟ زمان برضه … كان نادر تسمع حكايات عن”خيانة الأمانة “…الكلمة كانت واحدة … ومش لازم تتوثق ولا حاجة … كلمة الراجل كانت عهد … وانتشر مصطلح ” ده راجل كلمته واحدة “… زمان كمان كان اللي يدخل بيتك وياكل اكلك … يحافظ علي العشرة … ايه اللي بيحصل دلوقتي …وبعدين بأااااه في زمان اللي واجع قلوبنا ده … خلينا احنا في دلوقتي … ياختييييي علي دلوقتي … واللي بيحصل دلوقتيييي … – الست اللي بتساعدك في البيت … شايفة انها أحق بالنعمة اللي انت فيها … كده يبقي معاها صك بيقول ان السرقة حلال … زمان كانت الست اللي بتساعد دي عمود من اعمدة البيت … لا تترك البيت الا في حالة وفاتها … – الصديقة في حديقة الأطفال … تذهب لمراقبة المربيات … وتستخدم لغة المال لسرقة من تعجبها … – الصديقة المحامية ساعدت صديقتها في الحصول علي الطلاق … وتزوجت الرجل في نفس الأسبوع … – الزوج لا يري اي مشكلة في مغازلة زميلاته وقد يعرض الزواج العرفي … طالما ان هذه ال “هي ” لديها شقة … النصيحة الفصيحة … من واحدة … ذاقت لدغ العقارب السامة … – بيتك هو بيتك انت … مش نادي الصديقات العازبات … – حاولي يكون لدولابك مفاتيح … -أسرار علاقتك بزوجك … هي أسرار … وليست حكاوي القهاوي … – مفيش بيت مفيهوش مشاكل … لكن في مشاكل عادية محتملة … ومشاكل غير مقبولة … – اخيرا … الثقة تبني بالحب والاحترام والوقت …الخيانة تدمر كل ما هو جميل في كسر الثانية … فاحذروا …