مشيرة موسي تكتب : ” لا إحسان ولا حلاوة لسان “
![مشيرة موسى](https://misralan.net/wp-content/uploads/2023/01/9B4F2C40-51CA-4ACB-9BEB-35666E9C5278.jpeg)
النهاردة انتم معايا في زيارة قصيرة لزمان وكلام زمان …المثل ده بيتقال عن البخل “لا إحسان ولا حلاوة لسان ” … العلامة احمد تيمور باشا في كتابه “الأمثال العامية ” بيشرحه ببساطة …ان الشخص المقصود ده لن تأخذ منه إحسان ، ولا قول بمعروف … ببساطة كده في ناس بخيلة حتي بالكلمة الحلوة … متحبش تفرح حد ولا تجبر بخاطر حد …متفهمش دي غيرة ولا غلاسة ولا رغبة دفينة في إفساد فرحة اي انسان … علي فكرة ممكن نوع البخل ده يكون عند الست أو الراجل …
خليني اقول لكم كام مثل علي بخل الكلام ده …الإنسان اللي باقصده بيحب ويجد لذة انه ينكد علي الناس ويكسر قلبهم …زي ايه كده …
– تدخل بنوتة جميلة لابسة حلو وشكلها حلو …وهي فرحانة بنفسها كده … تلاقي اللي بينكد عليها ويبص الناحية الثانية وهو بيقارن بينها وبين بنت طنط فكيهة …مفيش اي كلمة حلوة …
– تعرف من الفيس بوك ان النهاردة عيد ميلاد ” ام سحلول “… فتعصر مخك وتدور في الرسايل القديمة علي تهنئة بعيد الميلاد …ولما تبعث الرسالة ام كلمات وامنيات حلوة …تلاقى الست بعد يومين عامله علامة ‘لايك ‘… يا نهار بخل … لا بجد فيه أيه … بدل ما تشكريني … بلاش يا ستي … ابعتيلي قلب …
– الناس الحلوة المتربية …اللي لما تدخل مكان … تشع حب وحنان … تبعت السلامات والتحيات … فتكاد لا تسمع اي رد مفيد أو مريح … فقط نظرات بلهاء لا تنم عن أي شئ … ارحمنا يا رب …
الحياة الصعبة اللي احنا بنعيشها عايزة اننا نطبطب علي بعض … نساعد بعض … نهون عن بعض …
انا بأااااه لقيت نفسي لازم افرمل العواطف شوية… انا جاية من عيلة بتدلدق العواطف والأحاسيس … مرات خالي زمان كانت بتقول علينا “انتم عيلة اذا نزلتم تجيبوا حاجة نسيتوها في العربية … تطلعوا تبوسوا بعض تاني ” …طبعا دي مبالغة … لكن افرضوا عملنا كده بحب وحنان … الكلام ده يزعل مين …الا بخيل العواطف جامد القلب … قررت اجمد قلبي وابطل ابعت قلوب للي يستاهل واللي ما يستاهلش … خلاص الناس هيشوفوا حد تاني … حد مش بيقول صباح السعادة والهنا وكل حاجة حلوة … مش بيقول سلامتك يا حبيبي ربنا يخليك ويحفظك لحبايبك … مش بيقول حاجات كتيييير حلوة تخفف المصاعب والمشاكل …
بعد ٣ ثواني من اصدار هذه القرارات الصارمة الجديدة… قررت انا الموقع أدناه … انني قد اصدرت فرمان اجدد … انا لن اتغير … سابعث للأحباء بالقلوب والورود والقبلات أيضا … لن الغي كلمة حبيبي وحبيبتي من قاموسي اليومي … سأظل انا انشر الحب والجمال والكلمات الطيبة … ربما تستطيع سهام حبي للحياة والناس ان تغير وترقق قلب قاسي …
علموا أولادكم … جبر الخواطر … علموا أولادكم …إن الكلمة الطيبة صدقة … علموا أولادكم … الحنان …