مشيرة موسي تكتب : ظل الحائط … افضل احيانا “

ايوه … انتم فهمتوها صح … وقاصدة اكتب واقول ان “ظل راجل ولا ظل حيطة ” ده كان زمان … ايام ما كان الواد بيتولد راجل … ويتربي علي انه راجل … دلوقتي أؤكد لكم ان مش كل ” ذكر ” في البطاقة يبقي ” راجل ” في الحقيقة … زمان لما الأستاذة سناء البيسي كانت رئيس تحرير مجلة نصف الدنيا …انا كتبت موضوع بنفس العنوان “ظل حيطة ولا ظل راجل ” وطبعا اتهاجمت جامد … بس انا كان ردي واضح وصريح … سألت انت بتعمل زي الكلام والحكايات المكتوبة … وطبعا كنت بسمع كلمة ال ” لا ” وهي طالعة من الجوف العميق … طيب ايه بأااااه … ليه النوع ده من الرجال مش بيفهم ويعرف يفرق بين الصح والغلط … شكلكم عايز يعرف الحكاية … بس انا هقولكم حكايات … * البنت الحلوة اللي زي القمر … جالها عريس … نقول مناسب من حيث الشكل والمستوى و و و و الخ … واتعمل للبنوتة احلي خطوبة … بنتنا غالية وتستاهل … تعدي الايام … قاعدة بنت عمة العروسة مع زميلتها في الشغل بتسمع منها قصة حبها الخيالي …وطبعا زي اي فيلم عربي بتوريها صورة حبيبها … اللي طلع هوه هوه عريس الغفلة … ياااااه دي الدنيا صغيرة جدااااااااا … البنت حبيبة عمتها حكت لابوها … الراجل نصح بنته تروح لعمتها … وكأنه ميعرفش حاجة … ما علينا العمة وجوزها للأسف رفضوا يكسروا بخاطر البنت ” اللي بتحبه ” قبل أيام من الفرح وقالوا “غلطة ” مش هتتكرر … وكان علي حبيبة عمتها ان تواجه زميلتها وتطالبها بالابتعاد … كما طالبت عريس الغفلة بالالتزام والا …. بعد الزواج بفترة قصيرة … اكتشفت العروس خيانة زوجها … يسكت هو … طبعا لا … وقف في الساحة يهلل انه مظلوم … لا ويؤكد كمان ان الموضوع ملفق من قريبة العروس الغيرانة من هذه العلاقة وحلاوتها لأنها لم تتزوج … مش هندخل في تفاصيل الحكاية ونهايتها … لكن ازاي المجرم المظبوط تلبس ده … يقدر يدافع عن نفسه … ويتكلم بعلو الصوت وكأنه صاحب حق … ما علينا … * حكاية ثانية … العريس ” سبع السباع ” خطب البنت … علي مدي سنة أو أكثر قليلا … داخل خارج من البيت … البنوتة اختارت عفشها وتجهيزاتها بعناية … الفساتين جت من البلاد البعيدة … فستان الفرح مالوش مثيل …يوم الفرحة الكبيرة تليفون الباشا مغلق …الباشا قرر ميجيش فرحه … الباشا الله لا يسهله سبب عقدة لا تزول بمرور الايام … * حكاية كمان … الراجل لازم يكون محترم … الأدب والتربية بيبان وقت الخلاف … الراجل اللي مش راجل اللي بيأخذ فلوس علشان يطلق بنات الناس … وهم كثر … الراجل اللي مش راجل اللي بيكون سبب أمراض لناس فتحوا له بيتهم ومنحوه اغلي ما عندهم … الراجل ده مفروض نصنفه ” مش راجل ” في البطاقة … ما علينا … أشباه الرجال دول عايزين قانون يربيهم …لأن واضح ان الاهالي ماكنتش فاضية تربي … كلي امل ورجاء … إن المدرسة ترجع الجزء التربوي اللي الأهالي فشلت فيه … وكلي امل ان الأهل ما يستعجلوش … في مثل بيقول ” قاعدة الخزانة … ولا جوازة الندامة ” … ربنا يسترها علي بناتنا …٧