مشيرة موسي تكتب: ” اعطني هذا الدواء “

زمان … زمان قوي … يعني قبل الألفية ماتبدأ بشويتين …كان من الممكن قياس حركتي بسرعة الصوت … أو مثلا … زي ما بنقول ساعات علي العيال ” ده بيفرك كتييير ” …اهوه انا كنت كده … لما الولاد كانوا صغيرين … وزي أي أم مصرية … كان ممكن الواحد يعمل ٥٠ حاجة في وقت واحد … وبدقة كمان … يعني المذاكرة مع الغسيل مع تحضير العشاء وقراءة موضوع للشغل مع متابعة الاخبار … عادي وكله في وقت واحد ومع بعض … كنت فاكرة ان ده لأني جوزائية … لكن طلع ان كل الستات المصريات اللي بتشتغل بتعمل كده … طيب ايه بأااااه فين الهمة دي راحت … مرة وانا في اوائل الأربعينات كده … كنت في زيارة لسانت كاترين … علي الساعة اتنين صباحا استعدينا علشان نطلع الجبل … كل الشباب كانوا بيشجعوني في الحقيقة … كلهم كانوا اقل من العشرين … حاجة تفرح بصراحة …وطبعا اخذت منهم كل الطاقة الايجابية الممكنة … لكن في نصف المسافة … نفسي اتقطع وحسيت بالتعب … خلاص يا عيال مش قادرة …قالوا طيب في جمل فاضي … تقولوش وقفوا لي تاكسي … انا قلت ” طيب ” … بس الحقيقة كان عمري ما ركبت جمل … الجمل برك وقالوا يلا … قعدت وفجأه الجمل اتنطر وقف … وانا في هذه اللحظة في الحقيقة جالي حالة رعب غير مسبوقة … وبدون أي خجل … صرخت ” نزلوني “… والله هاطلع لوحدي … وكملت طبعا … لكن نزلت اسأل علي قطع غيار موديل ٥٤ … مش بس كده … ده انا من مهام شغلي إني كنت بازور الأماكن الأثرية … فمرة تلاقيني انزل مقبرة أثرية … ومرة اطلع مأذنة … الحقيقة كان كل يوم حاجة جديدة … مهنة البحث عن المتاعب دي … كانت متعبة ممتعة … طيب ايه اللي حصل … يعني اشمعني باااااه لما الولاد والاحفاد أو أي ضيوف ييجوا … كل الشكاوي المرضية والاوجاع بتختفي … ولا بيكون في ” اي يا ظهري ” ولا في ” اي يا مفاصلي ” … طبعا الحمد لله علي كل شىء … انا في نعمة والله … لكن لو عايزة اوصف الحالة دي للدكتور .. هأقول ايه …ممكن مثلا اقوله ” هو زي ماتقول كده يا دكتور عندي حالة تعب او وهن ” … عارف انا ساعات بأبقي عاملة زي عروسة الماريونيت أم خيوط دي … اهو زي ما تقول كده بيجيلي احساس ان الخيوط اللي بتشغل كل حركة في جسمي … قدمت … مطت … رهرطت … ما بقتش ماسكة نفسها … ممكن من الزمن …او ممكن نقول من النوعية … المهم ان النتيجة … إن الجسم بأااااه يفضل الوضع الافقي عن الوضع الراسي … يعني ايه الكلام الكبير ده … يعني أفضل ان اقرا وانا في وضع التمدد علي الكنبة مش وضع الجلوس علي الكرسي … عدوا باااااه مع القراءة … مشاهدة التلفزيون … الرد علي الرسائل … اللعب علي الأي باد … كل ده طبعا اكبر غلط … وممكن يؤثر بل أثر فعلا علي النظر … عايزة اقول لكم … إن الكلام ده … فضفضة بس …مع احترامي للدكاترة كلها … انا مش عايزة أزور دكاترة أو أخذ أدوية … انا اكتشفت إني عايزة اعيش في سلام … وسط حبايبي واصحابي … عايزة اضحك من قلبي … عايزة انشر كل الطاقة الايجابية الممكنة … انا اكتشفت ان لمة الولاد والعيلة والأصحاب هي “أحسن دوا “… ربنا يكفيكم شر المرض …