مشيرة موسى تكتب ” عيش وجبنة “

زمان واحنا صغيرين … ايام الحر الشديد … كانت الأكلة الخفيفة المشتركة فى كل البيوت المصرية هى العيش والجبنة … مش الطبيخ يعنى … وطبعا ممكن معاها بأااااه حاجة تطرى على القلب … البطيخة الساقعة المرملة … اللى كنا بنشوف كل اب راجع من شغله شايلها على قلبه … يا سلام على جمال وحلاوة الأكلة دى … كنت تسمع الناس بتحلف فى العزومة على بعض وتقول بقلب جامد هناكل ” لقمة بجبنة” … للأسف مؤخرا الموضوع ده ” اللقمة بجبنة ” بقى شئ مكلف جدااااااااا … احد الأصدقاء كتب من فترة قصيرة ان وسط انشغاله بالعمل نسى يفطر … وانه دفع عشرين جنيه فى اكلة مكونة من رغيفين بلدى و٥ طعميات وشوية مخلل … الصديق عمل حسبة بسيطة لأسرة مكونة من أب وأم والعيال واكتشف ان الاكلة دى على ما اتذكر تكلف العيلة شهريا حوالى ٩ آلاف جنيه … ده بس بند العيش والطعمية من غير الجبنة البيضا والبطيخ … طبعا حد هيطلع يقول بيعملوا الطعمية فى البيت وكلام كتيييييير مالوش لازمة … وانا طبعا مش هرد … لأن انا ما جبتش سيرة حتة لحمة وشوية رز … ربنا يعين الناس اللى عندها عيال صغيرة … ده انا سافرت المصيف يومين لقيت ان فى فرق فى سعر البطيخة بس حوالى ١٠٠ جنيه … الحمد لله اننا ربينا العيال زمان وزمان جدااااااااا كمان … أصحاب كتيييييير بيحبوا انى اتكلم عن زمان وأيام زمان … وانا عن نفسى اقر واعترف انى بفضل شكل الحياة بتاعة زمان … وقت ما كانت العائلات مترابطة … ويوم الاجازة ده يوم لقاء الأسرة … وكل الأكل كان بيتى … والستات كلها كانت شاطرة وبتعرف تطبخ حتى لو كان فى حد بيساعد فى البيت … وطبعا طبعا ما كانش فى حاجة خالص اسمها وجبات سريعة ولا دليفري ولا كلام فارغ من ده … عدوا بأااااه كم الحاجات الحلوة اللى استغنينا عنها بمزاجنا جريا وراء التقليد الأعمى لناس تانية … دلوقتى شوفوا العيال اللى بطلت تأكل اكل البيت وبقت معتمده اعتماد كلى على ساندويتشات البرجر والبيتزا والبطاطس وطبعا مع الدلع وقلة المشى أصبحت أجسام الأطفال دى مترهلة للأسف … ومش هتكلم عن أكل الكبار علشان احنا كده هندخل فى موضوع كبيييير … وهنسمع طراطيش كلام كتيييييير … زى البالونة والتكميم والنحت وضيفوا على الكلام ده حقن مرض السكر اللى بتستخدم فى التخسيس … وطبعا علشان انا مش متابعة تفاصيل الموضوع ده … عرفت بالصدفة ان الست اللى بتدفع دم قلبها فى عملية النحت … بتفقد الاحساس تماما فى المنطقة اللى اتنحتت … يعنى بالعربى كده لو عملية النحت كانت فى منطقة الظهر مثلا … الست دى مش هتحس ابداااااا بأى خبطة أو حتى طبطبة فى منطقة الظهر … طولت عليكم … قولوا لا طبعا … وانا هصدق … لكن هقوم برضه احضر لقمة بجبنة بيضا … زى زمان واتفضلوا معايا ” بس للأسف من غير بطيخ “…