مشيرة موسى تكتب ” عروسة تفصيل “

بنت عمتي ” الحاجة شهيرة ” هى الحل لأى مشكلة بعون الله … ما شاء الله عليها … زمان واحنا صغيرين كانت هى الأخف دما … اذا اجتمعت شهيرة ومنال فى جلسة واحدة مع بقية أعضاء القبيلة يبقى عليه العوض … الضحك ممكن تسمعه من مصر الجديدة لحد الإسكندرية … هو من غير تحيز احنا عيلة تحب الضحك والفرفشة … معظمنا كبار وصغار دمنا خفيف ونكره النكد … لكن غصب عننا النكد بيعدى علينا كل فترة … نعمل ايه بأااااه … ما علينا … الحاجة شهيرة من فترة كبيرة درست وتعلمت وحفظت القرآن … هى بسم الله ما شاء الله مرجع لنا جميعا كبار وصغار … الحاجة شهيرة تحثنا دائما على فعل الخير … الحقيقة هى ومجموعة رائعة من الستات الفضليات بيبهرونا باهتماماتهن … مرات توصيل مياه نقية ومرات علاج ومرات مصاريف مدارس ومرات كثيرة ملابس وعلاج وكل ما يخطر على البال من طرق المساعدة الحقيقية فى صمت وبدون طبول الإعلان … الحاجة شهيرة بتساعد ” طوب الارض ” … وسامحوني انى استخدمت المصطلح ده … لأنها فعلا بتساعد كل الناس بدون سابق معرفة … طيب ما هى دى اصلا ” الحاجة شهيرة ” … ايه اللى جد يعنى … ولا اي حاجة … من ضمن مايعرض عليها من طلبات المساعدة … طلبات الزواج … حد عايز عريس أو عروسة … ايوه والله … يعنى ممكن رجل أرمل مثلا يكون بيدور على ست تشاركه حياته بدل وحدته أو ست وحدانية عايزة حد يشاركها حياتها … واوقات كتيييييير الستات الحلوة دى بتقدر توفق راسين فى الحلال … المعارف كتيييييير والناس الطيبة كتيييييير كمان … وعموما الطلبات بتكون دايما معقولة … فالرجل مثلا ممكن يطلبها ” بنت حلال ” أو عايزة تعيش … او يشترط مثلا ان تكون مطلقة بدون اولاد … وممكن طبعا تحديد السن المناسب … وكمان الستات ممكن تطلب مواصفات زى السن وتحديد مستوى التعليم او المعيشة المناسب… الغريب بأااااه ان الشباب كمان بدأ يطلب الزواج بالطريقة دى … حاجة كده بديل للخاطبة بتاعة زمان … رغم ان الشباب بيعرف وبيشوف بنات كتيييييير فى الشغل مثلا على الأقل … ايه بأااااه اللى استوقفنى انا … ما تضحكوش … بعض الشباب بيطلب العروسة تفصيل … يعنى الطول كذا والوزن كذا ولون البشرة كذا والشعر ناعم … يعنى مواصفات ملكة جمال الشاطئ مش مواصفات زوجة وأم اولاده فى المستقبل … كده لما يسألونى ليه بأااااه انتشر ” أبغض الحلال ” … الرد بسيط جدااااااااا … لأن أسس ” الحلال ” اصبحت هشة وهشة جدااااااااا … سمعت ام تقول باستهتار لابنتها ” ايه يعنى اتجوزى شهرين تلاتة … ما عجبكيش سيبيه … تكونى مطلقة احسن ما تكونى عانس ” … والله بأااااه لما الجوازات الخيبة دى ينتج عنها أطفال تعيسة … حرام ده ولا حلال …