مشيرة موسى تكتب ” رفقا بالنساء “

قابلت واحدة ست حلوة جدااااااااا … لكن … هو دايما فى لكن … اه … معرفتش احسها … هى كويسة ولا لأ … هى طيبة ولا بتمثل … هى ضعيفة ولا قوية … فيها حاجة خلتنى معرفتش اصنفها … والتصنيف هنا مش غنى وفقر … ولا متعلمة ولا مدعية … لا خالص … روحت وبالصدفة وانا بافكر فيها … شوفت فيديو خلانى اعرف ايه اللى محيرني … الفيديو باختصار بيقول ان هناك خمس علامات بتدل على ان الست تعرضت للايذاء العقلى (mentally abused ) … فى وقت ما من حياتها … اولا : انها تكون عمال على بطال بتعتذر … غلطت ولا مغلتطش … ممكن ده لان أهلها من صغرها كانوا بيلوموها سواء كان الخطأ منها او من غيرها … ثانيا : هى لا تصدق ابدا انها جميلة … حتى لو كل الناس شايفاها جميلة … وغالبا ده بيكون اما لانها وهى صغيرة كانت بتتعرض للانتقاد الدائم أو لأنها تعرضت للخيانة من شريك حياتها … ثالثا : انها بتنهار بعد اى خلاف بسيط … وده بيكون لتراكم اثر الخلافات والنقاشات الضارة ( التوكسيك ) التى تعرضت لها … رابعا : احتياجها الدائم للتأكيد على الأمان العاطفى … وغالبا ما يكون ده نتيجة الاهمال العاطفى فى علاقة سابقة وخوفها من الخسارة مرة أخرى … خامسا : انها لا تطلب ابدا اى مساعدة … ويصعب عليها ذلك …فقد اعتادت عمل كل شئ وحدها … ولم يكن هناك ابدا فى حياتها من تعتمد عليه … وكأن الفيديو القصير ده اللى بالانجليزى …متفصل على الست دى … الست دى نشأت فى بيت بيحب خلفة الصبيان بس … الست دى اتجوزت راجل خانها مع سيدة أخرى فى بيتها … الست دى فقدت الثقة فى نفسها … الست دى أهلها رفضوا فكرة طلاقها … الست دى عملت مشروع صغير لوحدها … الست دى رغم كل شىء ضعيفة جدااااااااا … انا بصراحة زعلت من نفسى … هما زمان قالوا ما تحكموش على الكتاب من عنوانه … وانا ما حكمتش والله …لكن فى حاجة فيها استوقفتنى … حاجة مش ماشية مع ست عاملة مشروع صغير حلو … قد ايه ممكن الأهل يكسروا بنتهم … قد ايه ممكن زوج يدمر زوجته … قد ايه ممكن المجتمع يهدد بكل جبروته واحدة ست … ارجوكم مش قد الخلفة بلاش … مش قد الجواز بلاشين … خللوا بالكم من بناتكم … الطف الكائنات … هتقولوا مش كلهن … أوافق بشدة … ولكن مش هنقدر نأخذ ذنب ناس بناس … التانيين دول. حسابهم عند ربنا …