مشيرة موسى تكتب : خميرة العكننة
دي خميرة العكننة… صفة بيقولها كل زوج “كيوت” عن مراته الغلبانة اللي سايبها شايلة لوحدها كل هم البيت … الزوج اللطيف ده، بيبقي قصده يحنن قلب زميلته اللطيفة…اللي شايلة بالمناسبة كل هم بيتها كمان…وبتعتبر الشغل هو المتنفس اللي ممكن تسمع فيه كلمة حلوة…أو تضحك ضحكتين…اللطيف بيبقي عايز يثبت للأمورة الغلبانة انها اختارتغلط… والامورة الغلبانة كل يوم بتتحسر علي بختها اللي وقعها في راجل …مش كيوت…زي سبع السباع ‘زميلها‘ …
الأمور بيكون عنده عيال…يعني عايش حياته الطبيعية…والبرنسيسة كمان عندها عيال من الراجل النكدي اللي معكنن عليها حياتها… طيب ايه الحل يا حلوين …يا اللي حلاوتكم ماسخة بزيادة؟؟؟
واحنا صغيرين…ابويا الله يرحمه …علمنا انه ممنوع نكشر علي الصبح… هو كان محامي حر… يعني مش موظف …كان بيقول لو بدأنا اليوم بالنكد…اليوم كله هيبقي نكد … والرزق هيهرب…وكل مكان هنروحه هننقل الطاقة السلبية دي …تعبانين ولا عيانين…ده شعور طبيعي…لكن مش لازم نأخذ الشعور ده معانا في كل حتة… الصبح يعني ابتسامة…يعني صباح السعادة والهنا…ناس زمان كان ردهم التلقائي علي “صباح الخير“… “يسعد صباحك“…
اتعلمنا كمان ان كل واحد له ٢٤ قيراط بس… لا يزيدوا ولا ينقصوا…ييجوا فلوس… ييجوا صحة…ييجوا عيال…يتقسموا علي كل دول…هما ٢٤ قيراط في النهاية… علي قد ماتحمدوا …علي قد ما تحسوا بالرضا…كلمة الحمد لله…مفتاح للسعادة اللي بتنبع من القلب… حاولوا كده…هتلاقوا الرضا…اشتغلوا علي نفسكم…سيبكم من الناس الكيوت اللي مش كيوت… اعرف ناس هدموا كل حاجة…ووصلوا الي ولا حاجة…اللي بيزن علي خراب عشكم ده…بيطير اول ما تتحرروا من قيودكم (اللي فاكرينها قيود)… اقعدوا مع بعض…حلوا مشاكلكم الشخصية في البيت …مش في الشغل…
يا ناس يا هوه…علموا عيالكم تحمل المسؤلية…علموا عيالكم ان الجواز مش خروج وسهر وفسح…علموا عيالكم ان اللي ماجاش النهاردة هييجي بكرة…علموا عيالكم الأولويات…ربوا عيالكم علي تحمل المسؤلية…حتي لو كانوا ملوك وملكات جمال
