مشيرة موسى تكتب … ” حاجة من كل حاجة “

* كل لحظة وانتم طيبين … الشتا رفض يدخل علينا متسللا … لا ده فتح الباب ودخل بقلب جامد … معملش حساب ان البنزين غلى … ولا سألش كيلو العدس بأااااه بكام … ولا ان فى ناس سابت بيوتها القديمة جدااااااااا بعد بدء تطبيق قانون الإسكان القديم ” الجديد ” … ما علينا … أمانة تعملوا حساب ناس لسه مش هتقدر تشترى هدوم شتوى … ويا ريت وانتم بتطلعوا الهدوم الشتوى المتخزنة من اول الصيف تراجعوا نفسكم … فى نظرية بتقول الحاجة اللى ملبستوهاش خالص فى الموسم كله يبقى ممكن حد تانى يستفيد بيها … ربنا يجازيكم خير … * لسه شايفة خبر فى فيديو ” امريكانى ” عجبنى … الجماعة دول عايزين يعملوا تاريخ بالعافية … الفيلم اللى نشرته ال ” سى ان ان ” بيعرض عملية فتح كبسولة زمنية مخزنة داخل جدران المتحف الوطنى التذكارى للحرب العالمية الاولى فى مدينة كانساس الامريكية …ودى طريقة كانوا ابتكروها لتوثيق الاحداث والتاريخ … المتحف فى اكتوبر سنة ١٩٢٤ جمع بعض الذكريات الملموسة فى صندوق معدنى وتم دفنها فى مكان معروف بالنتحف …على ان يتم استخراج الكبسولة بعد مرور ١٠٠ عام بالتمام والكمال لتروى لنا حكايات من ١٠٠ عام بالتمام والكمال … تضمنت الاثار الموجودة داخل الكبسولة صورا ورسائل وميداليات وبذور زراعية من سنة ١٩٢٤ … العاملين فى المتحف استخرجوا وفتحوا الكبسولة … وفى مسرح المدينة عرضوا ما تم حفظة فى كبسولة الذكريات … المتحف سمح للأطفال بقراءة الرسائل … سألوهم عن مشاعرهم … عن تصوراتهم … ثم تركوا للمواطنين فرصة الادلاء بالرأي وتصور ما الذى يمكن حفظه فى الكبسولة التى سيتم فتحها عام ٣٠٢٤ وعليكم خير … بس خلاص … دى ناس فاهمة بتصنع تاريخ بالعافية … * اخبار الكلاب البلدى الاسبوع ده حققت مشاهدات عالية جدااااااااا فى مصر والخارج … كلاب منها تم تكريمها جدااااااااا وكلاب اخرى تم تعذيبها بطريقة بشعة على يد ايادى مفروض ان تتصف بالرحمة … ومش هاقول واوصف اكثر من كده … بس تصوروا مثلا انى لازم اكسر ايد كلب بوحشية علشان اعلم طلبة كليات الطب البيطرى ازاى يجبسوها … القضية كبيرة وبتسئ لسمعتنا خاصة أن هناك بدائل حديثة للتعليم … والأمر الآن متروك لوزير التعليم العالى لاتخاذ اللازم …