مشيرة موسى تكتب ” اجازة الصيف “

زمان كانت اجازة الصيف دى حاجة مفروغ منها … يعنى مش بس العيال لازم تصيف … لا خاااالص المدام والأستاذ كمان (العيلة كلها ) … اللى بيعرف يحوش كان يحوش … واللى بيعرف يعمل جمعية يبقى خير وبركة … المصيف مكانش بس شواطئ الإسكندرية … لا كنا بنسمع عن جمصة وبلطيم وعشش رأس البر … وطبعا الست ليلى مراد اخذتنا معاها لشواطئ مرسى مطروح … المهم ان العيلة كانت لازم تتجمع فى المصيف … علشان لازم يزوروا المالح … الموضوع اختلف دلوقتى … المصايف اللى كنا بنسمع عنها بقوا يعتبروها حاجة ” مش قد كده ” … وطلعت مصايف تانية … ساحل طيب وسائل شرير … وبحر ابيض وبحر احمر وعين سخنة وعين مش عارفة ايه … المهم ان المصيف اختلف … والجديد ان عيال العيلة باااه كل واحد فيهم عايز يصيف لوحده مع اصحابه … والصيف مبقاش يجمع … على العكس تماما الصيف باااه يفرق … زيه زى جهاز الموبايل الشرير بالظبط … ما علينا … ربنا يجمع الحبايب … قولوا آمين … انا عايزة احكى عن سفرية الصيف ده اللى كنت باحلم بيها … من حظى انا الجوزائية اللى بتحب السفر والمعرفة ان شغلى ساعدني اشوف بلاد ومدن كتييييييرة فى اوروبا وامريكا وآسيا كمان … لكن انا كان نفسى اشوف بلاد معينة لها معالم تراثية خاصة بعيدا بااااه عن لندن وباريس … كان نفسى أزور الهند … وده اتحقق السنة اللى فاتت الحمد لله … وزرت كمان اوزبكستان … بلد الجمال والعراقة … اما الحلم الأكبر فكان زيارة روسيا وحصل فعلا … يا ربى على الحلاوة والجمال … اقول ايه واحكى ايه … الشوارع ولا المباني ولا المتاحف ولا محطات مترو الإنفاق … انا كنت عاملة زى القروى الساذج الذى بهرته أضواء المدينة … سألوني ايه اللى عجبك … الحقيقة انا انبهرت فعلا … انا واحدة بتبهرنى التفاصيل الصغيرة … من غير ما تضحكوا عليه … العربيات بتقف للمشاة … عمارات وسط البلد تحفة كلها بألوان الباستيل المتجانس … وكلها نفس الارتفاع … العمارة الواحدة قد يكون لها اكثر من مدخل وتمتد بالعرض من شارع لشارع … المياه فى نهر موسكوفا فى موسكو ونهر نيفا فى سانت بيترسبورج هى مياه امطار وتبدو للعين وكأنها مياه بحار بامواجها … لا شئ يعوق النظر لمياه الأنهار من اى مكان سواء كنا مترجلين أو فى سيارة أو أتوبيس … انا ممكن اكلمكم عن جمال الاسوار الممتدة بطول الأنهار وفروعها … وممكن اكلمكم عن عرض الشوارع وجودة رصفها ونظافتها والبالوعات التى تستوعب مياه الأمطار التى لا تتوقف فى بعض الأحيان … القصور ولا المتاحف ولا الكنائس ولا الجامع وكلها مباني اثرية قديمة جدااااااااا تم الحفاظ عليها واجراء الصيانة الدورية اللازمة … زرنا حدائق عامة غاية فى الإبداع … وطبعا الحديقة لازم يكون فيها نافورة … لا باعتذر … فيها عدة نافورات … الكافتيريات موجودة لكن زى ما تقولوا على استحياء … يعنى دون أن تعلن بفجاجة عن نفسها … زرنا حديقة فى سانت بيترسبورج أثناء هطول المطر … مفيش اى مشكلة … من الكشك اشترينا بالطو من النايلون لحماية الرأس والملابس من المطر وواقى بلاستيك يلبس لحماية الحذاء … بس خلاص … ايه المتعة دى … يعنى ماتشيلش اى هم … المهم عايزة اقولكم انى سعيدة جدااااااااا بالزيارة القصيرة لروسيا … ولو قدرت احوش وازورها تانى هاعمل كده … شعب بيفهم يعنى ايه اثار وسياحة على الرغم انهم ابتدو الموضوع ده من كام سنة بس … شعب عرف يحافظ على كنوزه واثاره ومبانيه المتوارثة … وطبعا فى سلبيات بسيطة منها انهم لا يتكلمون اى لغة غير الروسية … ولكن هناك دائمآ لغة الإشارة …