في حبك يارب تتلاقى الأعياد، وبحبك يارب يأنس الفؤاد، في حبك يارب تطيب المجالس وتتعطر الأذكار، وبحبك يارب يأمن الخائف ويشبع الجائع ويرتوي العطشان، في حبك يارب تتبدل الأحزان وتنزل النفحات، وبحبك يارب تجبر الكسور وتتنزل البركات ، في حبك يارب نتعلم المحبة الصادقة الحقيقية ، وبحبك يارب تصدق القلوب في العلن وفي الخفية ، في حبك يارب نتعايش ونتلاقى ونتسامح ونقتسم الأعمار ، وبحبك يارب نتسامى فوق الصغائر ونبتهل إليك بالمسرات ، في حبك يارب تعلمنا الحب والخير والعطاء ، وبحبك يارب بنينا في قلوبنا مدنا وأوطانا تمتد من الأرض إلى السماء ، في حبك يارب نمنح الحب لكل الناس ، وبحبك يارب نرجوك القبول وأنت رب الناس ، في حبك يارب الكون يسع الجميع ، وبحبك يارب نقتسم الخبزة والملح وظلمة الليل وضوء الفجر وكلنا نناجيك وأنت السميع ، في حبك يارب نفتقد الأحباب ، وبحبك يارب نظل نطرق الأبواب نلتمس الذكرى وتتوه في حبك الألباب ، في حبك يارب كلنا لك ، وبحبك يارب أنت لنا .
يا محمد يا محمد
نعم يا بابا
المغرب قرب وعايزين نجهز كيس البلح علشان نلحق نروح الجامع (مسجد شهاب الدين بمنطقة الديوان) بدري قبل المغرب علشان إفطار الصائمين في رمضان
حاضر نص ساعة بالكتير يكون جاهز
متنساش تزود البلح وتعبي الكيس على الاخر
حاضر هزود البلح وهعبي الكيس على الأخر انا دايما بفتكر ومش بنسى
أيوه طبعا لازم تفتكر علشان زي كل يوم من أول رمضان وأنا بذكرك وانت رايح الجامع بكيس البلح تعدي على عمك اسعد الخياط وتديله بلح وتروح عند الجامع لعمك نجيب وتديله بلح وعمك بشرى وعمك فؤاد وكل أهلنا وجيرانا اللي حوالين الجامع تديهم كمان رمضان ده يا ولدي شهر خير وبركة على الجميع
والله أنا بعمل كده كل يوم وانا رايح الجامع بروح عندهم وبديهم البلح زي ما حضرتك بتقول ومش بنسى
أيوه يا بني طبعا كل يوم لازم تفتكر ومتنساش احنا كلنا أهل وعشرة طيبة وجيرة حسنة وأوعى تنسى.
وجهز نفسك علشان هنروح أسيوط بكرة الصبح إن شاء الله عند الدكتور
حاضر إن شاء الله الصبح هكون جاهز
في صباح اليوم الثاني
يا محمد جاهز علشان نتوكل على الله
جاهز يابابا توكلنا على الله
نذهب إلى موقف سيارات الأجرة ونركب إحدى السيارات المتجهة إلى أسيوط وبعد أن ننتهي من زيارة طبيب العيون ونطمئن على أبي ينادي …
يا محمد كده خلصنا واطمنا الحمد لله
تمام يا بابا الحمد رب العالمين سلامتك ألف سلامة
يلا علشان نروح نشتري حلويات من أخر ساعة علشان نلحق نرجع بدري
نذهب أنا وأبي إلى محل الحلويات ويسألني أبي
احنا هنشتري كام علبة يا محمد؟
هنشتري علبة كبيرة لينا في البيت
لا احنا هنشتري لينا في البيت وهنشتري كمان لجيرانا في الشارع
أيوه يا بني مينفعش نجيب حلويات وندخل بيها البيت من غير منجيب لجيرانا معنا لازم نجيب لكل جيرانا في الشارع علشان نحس بطعم الحاجة وربنا يبارك لينا فيها وكلنا في الشارع أهل وجيران لازم تتعلم كده واوعى تنسى ومتنساش تفكرني بورق خالتك أم جورج علشان أخلصه لها بكره في المجلس
يا محمد
نعم يابابا
هم مش عايزين خضار في البيت؟
لا مش عايزين لأنهم لو محتاجين كانوا طلبوا مننا واحنا راجعين من الجامع
مش مهم انهم يكونوا عايزين المهم اننا نشتري خضار واحنا راجعين من الجامع
وفي رحلة العودة من الجامع أذهب أنا وأبي إلى السوق ونشتري كميات كبيرة من الخضروات وأسأله
احنا اشترينا كميات كبيرة من الخضروات ومش هنحتاجها كلها
مش مهم اللي مش هنحتاجه نوزعه على الجيران أو قرايبنا أو نشيله في التلاجة
طيب احنا ليه اشترينا الكميات الكبيرة دي
اشترينا من البياعين الغلابة اللي من الفجر فارشين وقاعدين على الأرض ومنتظرين ربنا يرزقهم ودول يا ولدي غلابة كلهم على الله اللي بيعملوا بيه هو اللي بيصرفوه على بيوتهم ودول غلابه متحملين البرد والحر ومن الفجر للمغرب قاعدين على الله خلينا نشتري منهم ونساعدهم ونقف جنبهم علشان ربنا يقف معنا ويبارك لنا ويكرمنا اتعلم يا ولدي وأوعى تنسى
وفي حبك يارب نفتقد الأحبة
