عينى بترف وراسى بتلف وعقلى فاضله دقيقة ويخف … لما العين اليمين بترف بنقول خير وبنتفائل .. ولما العين الشمال هى اللى بترف بنخاف وبنقول اللهم اجعله خير وبنتوقع شر.
الكلام ده جاى منين .. وايه أصله .. ورفة العين نفسها بتحصل ليه؟ وهل فعلا توقيت رفة العين بيختلف .. يعنى لو عينك رفت الصبح غير لما ترف بالليل أو الضهر .. وهل بتفرق رفة العين لما بتحصل لراجل أو ست.؟
قبل ما اجاوب خلينى اقول لكم الاول شوية تفاصيل كدا بيرددها الناس بتوع علم الطاقة عن رفة العين ..
بيقول لك ان رفة العين الشمال لو حصلت باليل فده معناه انه فيه ناس يتنصب لك فخ .. وانك هتوقع فى مشكلة كبيرة .. وافضل حاجة تعملها تقفل تليفونك وماتخرجش وماتردش على حد وماتقابلش اى بنى آدم لتانى يوم الصبح .
اما بقا لو اليمين هى اللى رفت بالليل يبقا يا هناك يا سعدك .. هتكسب فلوس انت او جايزة انت او اى حد من عيلتك… او جاى لك اخبار حلوة .
اما بقا لو رفة العين الشمال حصلت الظهر فده معناه ان فيه فلوس هتتسرق منك او توقع ومش هتلاقيها تانى .. ولو عينك اليمين هى اللى بترف يبقى هتجنى ثمرة تعبك وهتنجح فى اللى بتعمله
طيب الكلام ده بينطبق على الراجل والست .. يعنى رفة العين مابتفرش ؟
بتوع علم الطاقة بيقولوا اه مافيش فرق العين هى العين .. المهم خليك متسامح واشتغل بجدية وقدم الخير لكل اللى حواليك هتجنى خير وسعادة .
نرجع بقا لأصل الحكاية .. وعلى رأى اللى قال كل حاجة ليها أصل .. والأصل دايما بيرجع لأيام جدودنا قدماء المصريين .. من آلاف السنيين والمصريين بيخافوا من العين الشمال لما بترف .. بيتوقعوا شر وانه فيه حاجة هتحصل .. اشمعنا بقا العين الشمال … أنا اقول لك .. الحكاية راجعة لعين حورس .. العين الحامية للناس .. والأسطورة القديمة بتقول أن الإله “ست” وده إله الشر عند قدماء المصريين .. أخد العين الشمال لحورس ودى العين اللى كانت بتشوف الأمور الغامضة وبتحولها لخير .. ولما استولى عليها “ست” واتحكم فيها .. بقا حورس يشوف كل حاجة من خلال رؤية ست مش رؤيته هو .. وحصلت مصايب وكوارث كتير لان “ست” مابيشوفش ومش بيعمل غير الشر .. وبيتصرف بأنانية ومن غير عواطف .
وفى نهاية الصراع ما بين حورس وست .. قدر حورس يسترد عينه الشمال و”الاله تحوت” قدر يعالج له العين ورجعت تانى تشوف وتعمل الخير .
الأسطورة دى بقا هى السبب فى الخوف من رفة العين الشمال .. لأن من وقتها المصريين بقوا عارفين ان العين الشمال لما بتترعش ده دليل على حاجة شر جاية من ناحية الإله ست .. ولما بترف العين اليمين فده فال كويس لأن حورس مافقدش عينه اليمين وفضل يقدم بيها الخير حتى فى الفترة اللى فقد فيها عينه الشمال .
الحكاية دى فضلت تنتقل من جيل لجيل .. لحد ما وصلت لنا .. وبقينا نقولها من غير ما نعرف سببها .. وهتلاقى ادلة كتيرة على الكلام ده .. فعين حورس كانت بتترسم على الجسد والجدران وابواب البيوت كحماية من الارواح الشريرة والحسد وللحماية من الامراض والحيوانات الضارة … يعنى رجع حورس إله السماء والعدل والخير، وبقت عينه هى العين الحارسة اللى بتحمى الإنسان من الشرور والأمراض .. وبقت حتى رمز للدولة المصرية القديمة .
طيب الكلام العلمى عن رفة العين بيقول إيه؟
الأطباء بيقولوا سواء كانت اليمين او الشمال اللى بترف فده دليل على القلق النّفسي، والتوتر .. او ان الانسان ده عنده تشنجات حول العين بسبب التدخين او السهر والارهاق .. وقالوا هى مش خطيرة .. لكن مؤشر للانسان ده على انه لازم يرتاح .
