على رأى اللى قال ..”اللى بنى مصر كان فى الأصل حلوانى”.. النهاردة هكلمكم عن حكاية المشبك الدمياطى … أيووووة اسمه كدا فى كل الدنيا .. منسوب للمدينة اللى اخترعته وعملته وبقا علامة مسجلة بإسمها ..”سلو بلدنا” مافيش حد رايح ولا جاى من دمياط الا وبيكون محمل مشبك هدية لكل الحبايب .. الكل بيوصيه اوعى تنسى المشبك … رغم أن الدمايطة بيعملوا 248 نوع حلوى وكلها جميلة لكن اسمها اتشبك مع المشبك .
قبل ما اقول لكم ايمتا وليه اسمها اتشبك مع المشبك .. لازم نعرف أن الحلويات الدمياطية ليها شهرة عالمية وبتتميز بأنها بتتعمل من المكونات الطبيعية وسر الصنعة بينقله جيل لجيل .. يعنى صناعة الحلويات ميراث عائلى وفيه 3 عائلات فى دمياط هما الأشهر فى الصنعة وبيشتغلوا فيها من 200 سنة واكتر .
“الدمايطة” مشهورين بالشطارة وصنايعية فى كل حاجة بيعملوها يعنى جبنتهم احلى جبنة والالبان عندهم حاجة تانية .. حتى الفول المدمس من عندهم له طعم تانى .. أما بقا الاثاث بتاعهم سمعته واصلة اوربا وامريكا وبيطلبوه بالإسم .
ومش بس المشبك هو اللى بيعملوه حلو عندهم كمان أصناف حلويات تانية مشهورة زى “الفولية ، السمسمية، الحمصية، الهريسة، البقلاوة ، الكنافة ، الكحك، الغريبة، البسبوسة، اللديدة، لقمة القاضى، بلح الشام، القطايف والفطير”.
وفى كل مناسبة زى رمضان بتلاقى الناس واقفة طوابير على المحلات اللى بتبيع الحلويات الدمياطى .. ودى هتلاقيها فى كل حتة فى مصر من السلوم لأسوان .
طب ايمتا بدأ المشبك ؟ … أنا اقول لك .. البداية شاب حلوانى وسيم بيلف فى شوارع دمياط يبيع بضاعته شاف بنت حلوة ورا مشربية شباكها .. نادت عليه واشترت منه .. الشاب قرر يخطبها ويتجوزها وسهر طول الليل يخترع فى أكلة حلوة يقدمها لها هدية فى يوم الخطوبة .. وفعلا فى اليوم الموعود راح وقدم لها الحلوى الجديدة اللى استوحاها من مشربية شباكها وغطسها فى العسل .
“المشبك الدمياطى بقا له شهرة عالمية .. وفى الشام كانوا مسمينه “القاهرية” نسبة للقاهرة والكلام ده مذكور في كتاب “الوصلة للحبيب في وصف الطيبات والطيب”، وهو كتاب أكل شامي لإبن عديم الدمشقي كتبه سنة ٧٣١ هجري، وفيه ملحق خاص بالحلوى ذكر فيه اسم “القاهرية”، ووصف دقيق للحلوى اللى بتروح لهم من القاهرة .. وقال أنها فى مصر معروفة بإسم “المشبك” وقال كمان أن الحلوى دى ظهرت فى دمياط سنة 1262 .. يعنى فى القرن الـ13 … وذكره كمان المقريزى فى كتبه .. وقال انه بيتقدم فى عيد النيروز الفاطمى مع الزلابية.
طيب المشبك دى بقا بيتعمل من إيه ؟
أنا اقول لك .. المكونات الأساسية بتاعته دقيق ونشا درة ، و خميرة وسكر، وماء ورد ومعاهم مكونات تانية الى بتدى طعم وريحة مميزة خلت المشبك يستولى على قلوب المصريين وكل اللى داق المشبك فى الدنيا كلها … الكل حب طعمه وشكله الدائرى اللى على شكل خطوط متشابكة … وأهم حاجة بقا ظبطت العسل وكمية السكر .. ودى من أسرار الصنعة فى دمياط .. وليها موازين محددة بيسموها “عبارات” ودى اللى بيظبطوا بيها حلاوته واللى لازم تكون بالملى.
وبعد ما تحضر المكونات .. تبدأ صناعة المشبك بصبه من خلال الـ «جوزة» ..اسمها كده وهى اللى بتوزع العجين فى الصاجات بشكله الدائرى .. والصاجات دى بتبقى مليانة بالزيت المغلي وتتساب العجينة دقايق فيها وبعدها تيجى مرحلة القلي و بعدين يتحط المشبك فى إناء واسع مليان عسل .. وبعد ما بيتشرب العسل يتفرد على سطح واسع علشان يتهوى وبعدها يتلم ويتغلف ويتباع للزبون بالهنا والشفا.
من الأخر وعلى رأى اللى قال .. اذا كان اللى بنى مصر حلوانى يبقى اكيد كان من دمياط .. لأنهم أشطر ناس بتعمل حلويات فى بر المحروسة كله .. وهيفضل المشبك صنعة مصرية أصيلة وهيفضل اسمه مشبك دمياطى .
