شعبان ثابت يكتب : (الفقر نعمة)
أصدقائي وقرائي الأعزاء بمناسبة الحر والجو الذي يشكو منه الهاجع والناجع وإللي نايم على صرصور ودنه ومتتعبنيش وتقولي إيه الهاجع والناجع دول كمان ؟!
أسأل جوجل ما إنتوا جيل النت وإجابة أي سؤال لمسة زر لما عقولكم فضيت ومفيش تفكير؟
نرجع لموضوع الحر والصيف الناس إللي من حقها تشكي من الحر زي العمال والصنايعيه والحدادين والخبازين والنجارين وكل طائفة الحرفيين علشان مزعلش حد منهم جلهم حبايبي تلاقيهم شغالين وربنا مساعدهم ومقدرهم ولهم الأجر والثواب وحمدين ربنا وساكتين
(غلب الله أعلم)
(رضا)
برضه الله أعلم المهم أنهم ساكتين ؟!
إللي غاظني وخلاني أكتب في الموضوع إنك تلاقي الناس( الفافي) هما وعيالهم عايشين في كل أنواع الرفاهية من حمامات سباحه وجاكوزي وماكوزي ومش عارف إيه وتلاقيهم بيشكوا من الحر ويقولك مش طايقين البيت يوه غلطت قصدي الفيلا أو الكومباوند أو القصر أو السرايا طبعاً الحاجات دي إنتوا عارفينها من الأفلام والمسلسلات طبعا.
أوعوا تكونوا فاكريني بتريق عليكم لا دا أنا بتريق على حالي ما أنا واحد منكم.
المهم ياخدوا بعضيهم ويروحوا يصيفوا في الساحل الشمالي وما ادراك ما الساحل الشمالي وعلى إللي بيحصل في الساحل أوعى وشك على الحفلات والرقص والغنى والسكر والمجون والبكيني والمكيني والبوركيني وأسامي كده ما يعلم بيها غير ربنا وتلاقي الشباب والبنات شبه عاريات والعياذ بالله ويقولك بنصيف ؟!
والعيل من دول بيفكرني بلوسي في الفيلم لما يوسف وهبي قاله بتشتغل إيه قالوا (بابا) بيشتغل !!
الحمدلله على (الفقر) إللي خلى معظم الشباب بخير ومش وسطيهم ما هو الفقر أحيانا يبقى نعمه ورحمه من ربنا والغنى بلوه من ربنا أوعى تفتكر إن كل غني ربنا راضي عنه ولا كل فقير ربنا غاضب عليه ؟!
قل الحمد لله في السراء والضراء.
وإلى أن نلتقي في مقال آخر أترككم في رعاية الله وحفظه
