كشف عثمان بدران، الصديق المقرب لـ المخرج أحمد ثروت عن تطورات الحالة الصحية له، وذلك بعد إصابته بمتلازمة “الميلر فيشر”.
وكتب بدران، عبر حسابة علي الفيس بوك “من فترة كنت كتبت علي قصة الضغط العصبي وأن مافيش حاجة مستهلة و ده كان بسبب حبيبي و صديقي أحمد ثروت اللي عنده ٣١ ولا ٣٢ سنة و هو عنده شركة في مجال الدعاية و الاعلان .. زميل صنعة زي ما بيقولوا و من شوية ضغط في الشغل في خلال السنوات اللي فاتت جات له جلطة في عينه الشمال و الحمد لله بتتحسن و لكن تطور الموضوع اكتر و جه له مرض في الاعصاب نادر اوي اوي اسمه “متلازمة الميلر فيشر” و ده مرض بيجي ١٪ في المليون بيخلي الجهاز المناعي يهاجم الجهاز العصبي و حاليا مأثر علي رجله الشمال تماما و اليمين بنسبة ٥٠٪ زي ما أحمد قال لي.
وتستكمل “الحمد الله عزيمة أحمد في حتة تانية خالص و بيهزر و بيضحك و مؤمن و مبسوط ان ربنا اختصه .. بس النهارده يوم مهم جداً. أحمد سافر لألمانيا علشان المرض ده محتاج مركز متخصص لعلاجه و النهارده هيسحبوا عينه مياه من المخ علشان يحددوا الموضوع اكتر و يحطوا بروتوكول للعلاج بإذن الله، بناء علي نتيجة النهارده هيتحدد حاجات كتير اوي”.
وأضاف: “فضلا و ليس امراً ندعي لأحمد لعلكم اقرب الي الله انه يشفيه و يهون عليه و يربط علي ابوه الخلوق الجميل الفنان محمد ثروت وأمه وأخته وخطيبته”.
جدير بالذكر أن المخرج أحمد ثروت نجل الفنان محمد ثروت؛ قد تعرض لوعكة صحية ومرض مناعي نادر أصاب الجهاز العصبي «متلازمة الميلر فيشر» حجز على إثرها داخل أحد المستشفيات خلال الفترة القليلة الماضية.
