صباح السعادة والهنا علي كل الحبايب…اللي اعرفهم واللي ماعرفهمش … مش محتاجة افكركم وانتم سيد العارفين ، اننا بنعيش في احلي وقت في السنة دلوقتي، موسم الحمد والشكر ورد الجميل…يا سلام…ايوه والله…
-يعني ايه موسم الحمد والشكر …يعني من اول ما تصحوا لحد ما تناموا…ما تبطلوش تحمدوا المولي علي النعم اللي انتم غرقانين فيها…طبعا في ناس مش هيعجبها الكلام ده وتقول عليه باخرف وعايشة في عالم أخر…اصبروا عليه…دايما مستعجلين كده…شوفوا من اول ماتفتحوا عينيكم الصبح…دي نعمة…انتم قمتم من غفوة الموت المؤقت…يعني صحيتم الحمد لله …قمتم غسلتوا وشكم في الحمام …ده نعمة ان في مياه الحمد لله…حتي تخلصكم من بقايا اكل امبارح…ده نعمة كبيرة جدا….شوفوا الإمساك بيعكنن الواحد قد ايه…. نعم ربنا كتيييييير…الحمد لله…بصوا لحياتكم…واشكروا ربنا علي القليل والكتير…الحاجة اللي في ايدكم ومش عجباكم…ممكن تكون منتهي آمل حد تاني… في حكايات كتير عن ان الواحد مابيقدرش اللي معاه غير لما يروح منه….في حكايات كتير عن مشاهير اغنياء كان منتهي آمل حياته يأكل قرص طعمية….طعمياية…
مش لازم الحال يوصل لكده…بس في حاجات كتير بناخذها مسلمات… زي الأم والأب…زي الزوج أو الزوجة…زي العيال…زي الرزق…زي الصحة…زي نعمة انك تحط رأسك علي المخدة وتنام بدون منومات وأدوية… الحمد لله حمدا كثيرا…
علشان بس ما تقولوش اني عايشة في برج عاجي…أو اني عايشة في يوتوبيا…أو مش حاسة بالناس والآلام الكتير اللي حوالينا وفي كل مكان…لقد عشت تجربة “الsingle mum”…وعشت السخافات التي تواجهها المطلقة في مجتمعنا ذو المعايير المزدوجة…. ومررت باقصي تجربة فقد “الضني” …وحتي اللحظة اعاني من آلام عدم قدرتي علي فعل شىء “أثناء انسحاب الحياة من جسد ست الحبايب”…ورغم كل هذه الآلام فإن كلمة “الحمد لله “لا تغادر شفتاي…
– طيب الحمد والشكر وعرفناهم…ايه بأااااه رد الجميل ده…بصراحة دي احلي حاجة ممكن تعملوها وتحسوا بعدها بأحلى احساس ممكن الإنسان السوي يشعر بيه….الجميل ده مش لازم يكون حاجة مادية مع بني ادمين…الجميل اللي باتكلم عنه مع الخالق…يعني مثلا عمرك كنت في أزمة شديدة ومش عارف تعمل ايه…وفجأة لقيت الموضوع اتحل لوحده من حيث لا تحتسب …سبحان الله….دي بااااه بتبقي كأن ربنا بيطبطب عليك…ربنا بيقول لعبده… “انا معاك ” بالذمة في احلي من كده؟
مررت بتجارب صعبة وقاسية كتيييييير …انا بأااااه بأكلم ربنا علي طول…نفق العروبة ده قبل ازالته ياما شهد صريخي وتضرعي أثناء المرور به ” ربي حلها من عندك يا كريم “….سبحان الله… أحمدك يا رب حمدا كثيرا…وبعد ما انتقلت للسكن في الشيخ زايد….يشهد المحور علي حواراتي مع الله…اكيد لو حد سايق عربية جنبي هيقول “مجنونة “…مش مهم…
ازاي بأااااه نرد الجميل…طلع من معاك اللي تقدر عليه…القليل لو مطلعه بقلب ونية حلوة ممكن يحل مشاكل ناس تانية…مفيش فلوس… طلع حاجة من اللي عندك….اكل بيتي نظيف وملفوف كويس بشياكة…ملابس زيادة تستر ناس….طقم كوبايات ممكن يلزم جهاز عروسة….بطانية زيادة ممكن تكفي حد شر البرد…طلع اي حاجة بقلب حلو… طبطب علي الناس…هتلاقي ربنا بيطبطب عليك….علموا أولادكم رد الجميل… وكل لحظة وانتم طيبين ومتجمعين علي الخير وفعل الخير….
