محمد محمود عيسى يكتب : الشلة التي تحكم مصر
طبعا حضرتك خدك العنوان الصادم المثير ده وجذب انتباهك كالعادة وقلت ايه ده؟ مين الشلة اللي بتحكم مصر؟ وداخل على المقال من غير ما تاخد نفسك عاوز تلحق تعرف وبسرعة مين الشلة اللي بتحكم مصر وده طبعا بحكم اننا مجتمع بنجري وراء الأخبار المثيرة بنجري وراء الأخبار الحراقة علشان يمكن تضيف لنا…. معلومة …… لأ …. مش معلومة تضيف لنا حكاية أو قصة أو هبدة تخلينا نقعد في قعدة غليضة ونفتح صدرنا على الواسع وتقول للناس انت متعرفش مين اللي بيحكم مصر …. ياعمي ده فيه شلة بتحكم مصر وتروح واخد نفس عميق وترجع في الكرسي لورا وتقول بصوت (شتوي) فخيم أنا هقولكم على الشلة اللي بتحكم مصر وتروح راااااايح في الكلام وتحكي وتعيد وتزيد وده طبعا بعد ما تضيف البهارات ونكهتك الخاصة على الحكاية أو الهبدة …………….. ما علينا
ياعم محمد ادخل في الموضوع وبلاش إحراج
احكي ياعم على الشلة وقولنا عايزين نعرف مين هم
حاضر ياعمي بالراحة علينا أنا مقدر والله شغفك واستعجالك على الموضوع بس اصبر عليا شوية
طيب جاهز تعرف الشلة وتسمع الحكاية
تعالى بينا نعرف الحكاية من الأول بس خليني أحكيها براحتي وفي الأخر هتعرف كل حاجة وبالتفاصيل وهتتبسط خالص
بص يا سيدي مفهوم الشلة ده موجود تقريبا في كل حتة في مصر وخاصة في القطاعات الحيوية والمؤثرة يعني حضرتك كل مكان كبير ومهم ومؤثر تلاقي فيه شلة قافلين على نفسهم ومتحكمين في كل حاجة من أول التفاصيل الصغيرة لغاية كل التفاصيل الكبيرة بمعنى لو حضرتك مش عضو في الشلة دي مش هتقدر تطلع لفوق ولا توصل ولا صوتك ممكن حد يسمعه ولا صورتك حد ممكن يشوفها ولا تدخل تحت دايرة الضوء من غير ما الشلة دي ترضى عنك وتوافق عليك وتعطيك الضوء الأخضر وأكبر مثال على المفهوم ده هتلاقيه واضح جدا في الرياضة مثلا هتلاقي فيه شلة فوق قافلة الدنيا ومسيطرة وبتدير الأمور بحرفية وتحكم كبير مش ضروري الشلة تكون ظاهرة في الصورة لكن ممكن الشلة دي تكون خلف الكواليس لكنها هي المتحكمة في كل حاجة وفي كل التفاصيل وهي اللي بتدير كل الأمور كمان مثال تاني شوف الفن مثلا هتلاقي كمان فيه شلة مسيطرة على كل التفاصيل ومتحكمة في كل حاجة وعلشان تدخل وتمثل وتبيقى تحت دايرة الضوء والشهرة وعندك أعمال كتيرة ومنتشرة لازم تكون عضو في الشلة دي وكمان لازم الشلة ترضى عنك وتعطيك الضوء الأخضر علشان تشتغل في أعمال فنية كتير ولو انت مش عضو في الشلة دي أو الشلة دي مش راضية عنك هتقعد في البيت ولو مرضت هتدور على حد يجيب قرار علاج على نفقة الدولة كمان مثال تاني في الإعلام والصحافة مثلا هتلاقي كمان فيه شلة مسيطرة على كل الأمور ومتحكمة في كل حاجة وكبار خالص وبهوات جدا ومعاهم كل المفاتيح مين يدخل ومين يخرج وهتلاقيهم دايما في صدارة المشهد . في الثقافة هتلاقي كمان فيه شلة مسيطرة ومتحكمة في كل حاجة . مين يسافر في المؤتمرات الثقافية الخارجية ومين يشارك في الندوات الثقافية ومين نطبع له كتب ودواوين شعرية ومين اللي يظهر ويكون تحت الأضواء وحاضر في كل المشاهد والندوات والحفلات والمهرجانات حتى على مستوى الأقاليم الثقافية هتلاقي فيه شلة هي اللي متصدرة كل المشاهد والندوات والمؤتمرات والحفلات .
مجالات كتير جدا هتلاقي فيها الشلة ظاهرة ومسيطرة ومتحكمة في كل حاجة اللي معانا في الشلة ندعمه ونساعده ونظهره واللي بره الشلة خليه قاعد في مكانه هتقولي الموهبة والقدرات والحكايات والروايات والشهادات والتخصصات مفاهيم الشلة مش بتعترف بالحاجات دي خالص أو على الأقل بتخليها أولوية تانية لكن الأولوية الأولى في عالم الشلة انك تمتلك مواهب وقدرات تانية تخليك عضو في الشلة اللي هي شلتك في مجالك وتخصصك وعلى فكرة مفهوم الشلة منتشر في حاجات كتير وفي مجالات أكتر يمكن تستغرب أكتر لما أقولك ان حتى المجموعات اللي بيطلق عليها دولجية اللي هم تبع الدولة واللي بيأيدوها والمساندين والداعمين ليها دول كمان داخل فيهم مفهوم الشلة حتى وان اختلفت المواقف والمعايير لكن هتلاقي مفهوم الشلة مسيطر عليهم بمعنى هتلاقي شلة داعمين جدا لبعض وبيشجعوا بعض وبيعلقوا عند بعض وغالبا عارفين بعض وصعب شوية انك تدخل معاهم وتقتحمهم لكن في كل الأحول ممكن تدخل معاهم ويقبلوك شوية شوية
مفهوم الشلة موجود ومنتشر في كل المجالات وطبعا مفهوم الشلة السفن ستارز الكبار في مجال الأعمال والتجارة والسوق والداخل والخارج ده قصة تانية خاااااالص وشلل في حتة تانية خالص (ربنا يجعل كلامنا خفيف عليهم)
يمكن موضوع الشلة ده يكون جزء من ثقافتنا جزء مثلا من تاريخنا يمكن يكون نتيجة لتراكم عادات وتقاليد وثقافات في الحياة والمجتمع توارثناها من سنين طويلة وصنعناها وأصبحت جزء من واقعنا اللي عايشنه
يمكن تكون الشلة نتيجة تراكمات طويلة من خلل حصل في المجتمع خلال السنوات الطويلة الماضية وأصبحت الشلة واقع وجزء من التأثير في المجتمع والحياة وحققت مكاسب كبيرة صعب جدا انك تفرض عليها انها تتخلى عنه.
مفهوم الشلة واقع موجود ولازم نعترف بيه لو عايزين بالفعل نصلح المجتمع ونبني حياة جديدة ونؤسس لواقع عصري وعلمي حديث يليق بمصر الحضارة والمستقبل وعلشان كده لو امتكلت القدرة انك تغير مفهوم وثقافة وواقع الشلة المنتشر في كتير من المجالات وتفرض مفهومك انت اللي هو مفهوم الموهبة والعلم والقدرة والتخصص والامكانيات والشهادات صدقني هتلاقي البلد كلها في حتة تانية خالص غير اللي اللي شايفه دلوقت تماما
أه نسيت أقولك على الشلة اللي يتحكم مصر ….. معلش ….. أنا أسف
ما أنا قلت لك فوق في تفاصيل المقال بس انت اللي ما أخدتش بالك. بس انت اللي عايز تسمع قصص وحكايات وأفلام هندي
