مشيرة موسى تكتب … ” اختبار مفاجئ “

عايزة احكى لكم حاجة … الاسبوع اللى فات عانيت من شوية متاعب صحية … اسبوع كده رايح جاى مستشفيات … مش عايزاكم تقلقوا … انا الحمد لله والشكر لله كويسة جدااااااااا وزى الفل دلوقتى … بصوا بعد ما فوقت … اعتقد انه ” الحمد لله ” اللى مريت بيه مكانش مرض حقيقى … لكن هو كان على الأرجح ” اختبار صعب ” … واعتقد والله اعلم ان انا نجحت … ليه بأااااه باقول كده … لان ربنا عالم بحالى … وعارف انى لا اكف عن حمده فى كل وقت وكل مكان … وانا متأكدة جدااااااااا ومصدقة ان ” يقينى بالله يقينى ” … واقر واعترف انى انا فى وقت شدتى لم اتوقف عن حمده … وكمان لم اتوقف فى نفس الوقت عن الدعاء من قلبى لكل المرضى اللى اعرفهم واللى مااعرفهمش … فى وسط كل الكركبة دى لقيت حد من حبايبى باعت لى جملة جميلة صادقة فرحت قلبى بتقول … ” وتظن من فرط لطفه بك … انك عبده الوحيد ” … الله على جمالك ولطفك يا رب … شوفوا الحلاوة والنبى … فجأة لقيت كل الآلم اترفع عنى … وبدون مقدمات ربنا طبطب عليه … وكأنه بيقول لى مبروك نجحتى فى الاختبار … الف حمد وشكر … مش بس كده … الكريم الجبار اكرمنى بهبات وهدايا لا تعد ولا تحصى … اكرمنى بافراد اسرة لا مثيل لهم … واكرمنى كمان باصدقاء امطرونى بحبهم وكرمهم بزيادة … وافتكرت دعوة جدتى ” ربنا يحبب فيك خلقه ” … الله لما يكون من نصيبكم حب الناس اللى بحقيقى … الله لما الناس تكلمك أو تجيلك علشان بتحبك مش علشان طلب او منفعة … الله لما تشوف القلق والحب فى نفس اللحظة فى عيون الحبايب … ربنا ما يحرمكم من حبايبكم … … اوعوا ما تسألوش على كباركم أو مرضاكم … اوعوا تخلوا قلبكم يقسى … نص الشفا من احساس المريض بالحب والاهمية … ربنا يشفى كل مريض … قولوا امين يا رب …