مشيرة موسى تكتب ” لو كنت المسؤول “
- امبارح شوفت فيديو رائع للصديق العزيز والمفكر الرائع والوزير الأسبق فاروق حسنى … انا عرفت
” الراجل المصرى ده حتى النخاع ” من سنين طويلة … وفى كل مرة بيتاح لى لقائه بيبهرنى اكتر واكتر … فى لقاء تلفزيوني قال فاروق حسنى انه يرى ان المتحف الكبير سحب البساط اثريا من المتحف المصرى بميدان التحرير … وان السائح القادم لزيارة المتحف سيفضل زيارة المتحف الكبير … ولكنه يرى ان مبنى المتحف المصرى مبنى عظيم بنى وصمم ليكون متحفا فلماذا لا يحول إلى أكبر مركز لدراسة علم المصريات بحيث يضم مكتبة عظيمة وقاعات للمتاحف المؤقتة (٦شهور الى سنة ) وقاعات للمحاضرات خاصة وان هناك فى مصر ٢٤٠ بعثة أثرية من مختلف بلاد العالم … وكده اى حد عايز يدرس علم المصريات يقوم بالتردد على المتحف المصرى بميدان التحرير مثلما يحدث فى متاحف اللوفر والمتروبوليتان وبرلين … الحقيقة الفكرة عظيمة … ويا ريت المسؤول يدرس الفكرة ويبدا فى بحث طرق تطبيقها … ** قرأت خبر خلانى مش عارفة انام … الخبر بيقول ان الست المطلقة الحاضنة للأبناء عليها ترك الشقة التى تقيم فيها مع الأبناء فور بلوغهم السن القانوني حتى ( وخلوا بالكم من حتى دى) لو استمر الاولاد فى حضانتها والإقامة معها … طيب ايه … يعنى الزوج السابق حتى لو مش طايق ام عياله اللى قاعدة تربى له عياله … واللى ما اتجوزتش تانى علشان تربى له عياله … ازاى تاخذ عياله وتمشى … وتمشى تروح على فين والنبى … قولوا لى والنبى علشان ساعات مخى بيهنج … يا ريت المسؤول يكون رؤوف رحيم ويعيد التفكير فى القرار ده لو صح الكلام … ارحموا من في الأرض يرحمكم من فى السماء … * التالتة تابتة بأااااه زى ما بيقولوا … وانا بكتبها وعارفة ان ما فيش مسؤول هيقدر يعمل حاجة او يصدر قرار بصراحة … بس زى ما الشوام بيقولوا ” طق حنك ” … انا شايفة وراصدة كم تعليقات فيها قلة أدب وكلام يحاسب عليه القانون على منصات التواصل الاجتماعى … وده شئ طبعا مؤذى جدااااااااا جدااااااااا … مش عارفة ايه الحل فى العيال والكبار ( ستات ورجالة للأسف ) اللى بينطقوا الفوحش … ومش عارفة اذا كان فى نص فى القانون بيجرم التنمر والتطاول فى تعليقات الفيسبوك وخلافه … ربنا يسترها معانا ويخلصنا من الأشكال دى …
