مشيرة موسى تكتب ” بين البقال والسوبر ماركت “

رمضان كريم … وكريم جدااااااااا كمان … انا كنت قاعدة بافتكر وبفكر فى رمضان بتاع زمان … اقول لكم كلمة سر … رمضان بتاع زمان كسب … اه والله … انا مش بأحب الكلام الكبير المبقلظ بتاع اخوانا الإعلاميين … بس الحقيقة لازم اعترف اننا أصبحنا عالم مادى جدااااااااا … عدى كده قدام اى سوبر ماركت وشوف الناس طالعة شايلة وشارية ايه … تقول الأكل هيخلص قبل ما رمضان يبتدى … وفى نفس الوقت ناس تانية شغلها الشاغل وسؤالها اللى مالوش إجابة لحد دلوقتى ” احنا هنقبض امتى … قبل رمضان ولا اول الشهر ” … انا شايفة ناس بتوزع كراتين رمضان وناس بتدور على كراتين رمضان … وناس عاملة ترند وعايزة تستفيد من غلب الناس وحاجتهم … زمان رمضان كان حاجة تانية … عارفين الفرق بين رمضان زمان ورمضان دلوقتى ايه … هو هو نفس الفرق بين محل البقالة والسوبر ماركت … زمان عم عبده البقال كان عارف كل زباينه بالأسم … عارف اولاد الدكتور عبد السلام وعارف ولاد عم محمد البواب … البقال كان عارف انه ممكن يبعت الطلبات لجماعةاستاذ أنور لحد ما الأستاذ يرجع من المدرسة وعارف انه هيبعت طلبات جماعة المرحوم الأستاذ ابراهيم رغم انه مش هياخد حسابه غير اول الشهر … زمان كان فى حساب ” على النوتة ” للناس اللى عندها ظروف … وكان فى كمان ” فاعل الخير ” … اللى بيروح يسدد الحساب اللى ” على النوتة … فى السر … ولا من شاف ولا من درى ” … كان فى حاجة اسمها تكافل اجتماعى ورحمة ورأفة وكلام كتيييييير بقينا نقرأ عنه فى الكتب بس … نفس الكلام ده كان بيتم عند الجزار والخضرى والفكاهانى … وطبعا الكلام ده بطل يحصل من اول ما ابتدينا انشاء سلسلة السوبرماركت ال ” لا انسانية ” التى قوامها ” المكاسب المادية الفورية ” دون النظر الى ” الانسان ” وظروفه … زمان زمان زمان … قول للزمان ارجع يا زمان … اقول ايه ولا ايه … شوفوا الفرق بين فانوس رمضان بتاع زمان وفانوس دلوقتى البلاستيك صناعة البلاد البعيدة و ” المتزغط ” بالأغاني السخيفة … وبمناسبة الأغانى الرمضانية … اسمعوا اغانى رمضان الجديدة اللى ” ناقصة سوى ” واغانى رمضان القديمة اللى بتحرك الوجدان … وطبعا مش هتكلم عن كنافة زمان ” الطبيعية ” اللى كبيرها تكون محشية سودانى أو مكسرات أو حتى قشطة … وكثافة دلوقتى المحشية بأى حاجة تقع تحت ايد اللى بيعمل صينية الكنافة علشان يعمل ترند … اكيد احنا لسه مش عارفين كنافة السنة دى هتكون محشية ايه … على اى حال … انا عايزة اقول لكم كل لحظة وانتم وحبايبكم بخير … ورمضان كريم … وكريم جدااااااااا كمان …