مشيرة موسى تكتب ” الست ثومة “

ساعات كده الواحد بيأخذ قرارات عنترية جريئة مش وقتها او بمعنى اصح هو مش قدها … من كام يوم قررت اوضب المكتبة … فراغ بأااااه ولا ايه … الحقيقة المكتبة دى بالنسبة لى حاجة مهمة … يعنى أهميتها لقلبى وعقلى بتوصل لأهمية ” النيش ” فى معظم البيوت المصرية … زمان وأنا فى بيت مصر الجديدة اكتشفت ان كتبى ” توحشت ” وخرجت من المكتبة لتحتل أجزاء كبيرة جدااااااااا من البيت … بعض الكتب الهامة ورثتها من مكتبة أمى وابويا … وبعضها كانت أهداءات من الأصدقاء … والبعض الأخر كنت باشتريها بمالى الخاص من مصر ومن سفريات للخارج ودى معظمها كانت عن مصر والآثار … الحقيقة لما كنت برجع من السفر كان دايما بيبقى معايا شنطتين … اولادى كانوا بيعرفوا شنطة الكتب من وزنها … وطبعا الشنطة التانية كان بيبقى فيها هداياهم … بعد الولاد ما اتجوزوا … قررت الاستعداد لبلوغ سن الاستمتاع بوقت الفراغ والراحة فقررت انى انتقل لمكان أصغر بجنينة صغيرة استمتع بيها انا وكلابى … فوجئت بعد العزال ان عندى اكثر من ١٠ صناديق كبيرة مملوءة بكتب بعضها اكيد لن التفت اليه مرة أخرى … قررت الإتصال بالصديق العزيز الدكتور احمد مجاهد وسألته اذا كانت مكتبات الأقاليم تقبل هديتى من الكتب … الحقيقة هو رحب بالفكرة وأرسل عربة نقل لاستلام الكتب وفرزها وتوزيعها على المكتبات … اتعلمت وبقيت كل فترة اقوم بعملية الفرز دى … ثم اقوم باهداء الكتب للأصدقاء كل حسب تخصصه واهتماماته … كل الكلام ده لزومه ايه بأااااه … جيالكم فى الكلام اهوه … وانا بأفرز الكتب … لقيت الجزء الأول من موسوعة اعلام الموسيقى العربية ” ام كلثوم ” اعداد الدكتورة ايزيس فتح الله ومحمود كامل … صادر عن مركز توثيق التراث الحضارى والطبيعى بالتعاون مع دار الشروق … ايه الجمال ده … ليه بأااااه لفت انتباهي ومسكته وعمالة اقلب فيه ومش قادرة اسيبه … يوم ٣ فبراير هنحتفل ( مش عارفة ازاى بنستخدم فعل ” نحتفل ” فى هذا السياق ) … هنحتفل بمرور ٥٠ عام على وفاة ” الست ثومة ” … اللى متعتنا بصوتها على مدى ٥٠ عاما … يعنى عندنا ١٠٠ سنة ام كلثوم … الست ام كلثوم … أو فاطمة ابراهيم البلتاجى ولدت فى ٣١ ديسمبر ١٨٩٨ بقرية السنبلاوين بمحافظة الشرقية … وبدأت مسيرتها الفنية عام ١٩٢٤ … الموسوعة تقع فى ٤٨٢ صفحة مع هدية اسطوانة من مقتطفات اغانى ام كلثوم … الحقيقة كل سطر فى الموسوعة مهم … من اول مقدمة الموسوعة التى كتبها الدكتور فتحى صالح مدير مركز توثيق التراث الحضارى والطبيعى حتى آخر صفحة … قصة لقاء احمد رامى وأم كلثوم الأول … وهو ما ترتب عليه نظمه لثلاث قصائد من وحى ام كلثوم كانت اولاها فى سبتمبر ١٩٢٤ … ولأم كلثوم ثلاث محاولات فى مجال التلحين كانت الأولى منها عام ١٩٢٨ … وفى الموسوعة فهرست نصوص اعمال ام كلثوم كاملة مرتبة ترتيبا ابجديا … بالاضافة للاعمال الغنائية السينمائية … والاعمال الغنائية الاذاعية … واوبرا عايدة … * وسجلت احصائية أعمال ام كلثوم مع الزمن … عمل واحد فى الفترة من ١٩١٠ إلى ١٩٢٠ … ٤٨ عمل من ١٩٢٠ إلى ١٩٣٠ .. ٩٣ عمل من عام ٣٠ إلى ٤٠ … ٨٢ عمل من عام ٤٠ إلى ٥٠ … ٣٨ عمل من ٥٠ إلى ٦٠ … ٤٨ عمل من ٦٠ إلى ٧٠ … واخيرا ١١ عمل من ٧٠ حتى رحيلها عام ١٩٧٥ … * وسجلت احصائية أعمال ام كلثوم مع الملحنين … سيطرة ألحان رياض السنباطى ( ٣٣.١٣ % ) ثم القصبجى (٢٢.٦ % ) ثم زكريا احمد (٢٢.٢٩ % ) ثم احمد صبرى النجريدى (٤% ) داود حسنى ( ٣.٤ %) بليغ حمدى (٣.٤% ) ابو العلا محمد ( ٣.١ % ) محمد عبد الوهاب ( ٣.١% ) محمد الموجى (٢.٧٨ %) وآخرين(٢.٤% ) … * وسجلت احصائية أعمال ام كلثوم مع المؤلفين … احمد رامى( ٤٦.١٣ %) محمود بيرم التونسي ( ١١.٧٦ %) احمد شوقى (٣.٤ %) عبد الفتاح مصطفى (٣.٤ %) عبد الوهاب محمد ( ٣.١% )طاهر ابو فاشا ( ٢.٧٨ %) وآخرون (٢٩.٤٣ %) … * وسجلت احصائية ام كلثوم مع القوالب … طقطوقة ( ٣٤.٣٧ % ) قصيدة ( ٢٦ % ) مونولوج ( ٢٦ %) دور ( ٥.٨٩ % ) نشيد ( ٢.٧٩ % ) وقوالب أخرى ( ٤.٩٥ % ) … و يبقى ان اعترف اننى لم اصدق ان الست ام كلثوم ” الوقورة ” غنت بعض ما جاء فى الموسوعة … غنت مثلا عام ١٩٤٣ طقطوقة ” اكتب لى كتير من غير تأخير ” لبيرم التونسي ألحان زكريا احمد مقام بياتى … اكتب لى كتير من غير تأخير … اكتب لى كتير انا جانى جوابك وقريته وجمالك فى سطوره رأيته بدلالك هواه وشمايلك والله بوسته وضميته. اكتب لى. وجوابك فى الوحدة واسانى ولو انه حرك اشجانى. كم مره اقراه من تانى ويبان لى فى كلامه معانى. افهمها لوحدى وقاتلانى وده قصدك واللى انت ناويته ساعة ما كتبته وانشيته اكتب لى. اكتب لى واشرح لى وقول عن قلبك وبايه مشغول. وغيابك قد ايه حيطول. دا كفاية على اللى قاسيته من بعدك دا اللى انت رضيته اكتب لى … تتصوروا ٥٠ عاما بالتمام والكمال مرت على رحيل الست ام كلثوم … ولسه انا بستناها الساعة ١١ كل يوم علشان اسمعها … ولسه جيل من الشباب بيغني اغانيها … ولسه فى كتب بتتكتب عنها … ولسه الست بتثبت … رغم انها مش موجودة معانا … إن الفرق كبييييير بين الطرب الأصيل وبين العك والركاكة …