مشيرة موسي تكتب : ” الصيفي والشتوي “

كل لحظة وانتم طيبين … بين يوم وليلة … الشتا قرر ييجي خلاص … انا بصراحة بحب الشتا اكتر من الصيف … لكن بشويش علينا …مش ننام وفجأه نقوم نلاقي الدنيا بتمطر واحنا كنا لسه متغطيين بالكوفرته … ما علينا …” الشتا جه ” الحاضر يقول للغايب … لازم نشيل اللبس الصيفي وننزل اللبس الشتوي … علقة ساخنة … مفيش كلام … في ناس عندها الموضوع عادي … هو ممكن يكون عندها اصلا دواليب صيفي ودواليب شتوي … مفيش مشكلة ربنا يبارك ويزيد … وفي ناس عندها اللي بيشيل ويحط وهما قاعدين رجل علي رجل أو حتي مش قاعدين اصلا … ربنا يسهل للجميع … * رغم سخافة هذا الموضوع … الا انني افضل القيام بهذه العملية بنفسي … الروتين يبدأ بتطبيق الملابس الصيفية النظيفة … اصنفها بالألوان … كلها ملابس قطنية … اكتشفت من سنوات شنط التخزين الكبيرة المصنعة من القماش أو البلاستيك لحفظ البطاطين والاغطية … فبدات في استخدامها للملابس … اختراع بصراحة … اقلب اول شنطة … أبدأ في رص الملابس الصيفي … وبعد الانتهاء اعيدها للدولاب … ثم أبدأ في فرز كومة الملابس الشتوي … بعض الملابس أجدها مناسبة … اعلقها أو ارسلها للمكوجي … وبعضها اصبح غير مناسب … هذه الملابس اجمعها في أكياس ليتم توزيعها مباشرة … للإسف بعض السيدات يفضلن الاحتفاظ بالملابس ” اللي صغرت ” … يعتقدن ان هذه الزيادة في الوزن ستزول بمرور الوقت … وهذا وهم منتشر واقرب الي المستحيلات … اعتقد ان الابقاء علي الملابس غير المناسبة اوالصغيرة … يصيب الإنسان بالاكتئاب … تبرعك بالملابس غير المناسبة سيخلصكم من كم هائل من السلبيات في محيط البيت … * اما السيناريو المتكرر في البيوت متوسطة الحال والبسيطة … عند ام العيال … ان الست دي هتجيب السلم ( أو تقف علي كرسي ) لانزال الشنط من فوق الدولاب … دي بااااه هي اللي بيطلع عينها … الله يكون في عونها … بعد ما مسحت التراب اللي فوق الشنطة …فتحتها … يا دي” الحوسة ” … هما العيال دول كبروا امتي … طيب لبس الواد الكبير …هياخده الواد الصغير …طيب والبنت … تتمتم يعني لازم اجيب بيجامتين للكبير وبيجامتين للبنت … ده غير البلوفرات … تتمتم مرة اخري هو ده اللي كنت شايلة همه … الحمد لله ” فلوس الجمعية جت في وقتها ” … * نصيحتي من القلب … تخلصوا من الملابس التي لا تناسبكم … ستشعرون بالكثير من الراحة … كما انكم ستشعرون بتحسن كبير في المزاج … هناك جمعيات تقوم بهذا الدور … ولكني افضل توزيع هذه الملابس علي الأقربون … فهذا افضل … بصراحة الكراكيب تجذب قلة المزاج وقلة الراحة… تصدقوا … الشتاء صعب السنة دي … علموا أولادكم المشاركة … علموا أولادكم عدم الاستحواذ … علموا أولادكم جبر الخواطر …